Makalibog

Nalipay kaayo ang daghang senior citizens dinhi sa Cebu City nga sa dugay’ng katuigan sa ilang pagpaabot, makadawat na sila og cash assistance gikan sa Cebu City government.

Kadtong mga narehistro ug nakabotar lang gikan sa 2014, wa dayon sila makadawat kay ang ordinansa sa siyudad naglatid man nga kadto ra nga narehistro sa Comelec ug nakabotar sa eleksyon niadtong 2013 maoy hatagan. Daghan man nga uwahi na nagparehistro dinhi.

Matud ni Mayor Nestor Archival nga kapin sa 7,000 ka senior citizens nga dugay na nga nagpaabot nga mahatagan sila og cash assistance, makadawat na kuno karong Oktubre 25.

Ang dili detalyado nga kasayuran nakapalibog sa mga senior citizens, ilabi na kadtong nangindahay nga makadawat na. Bisan ang mga report sa pipila ka media outlets makalibog sab.

Ang usa ka media outlet miingon “City Hall confirmed that the distribution will cover unpaid amounts from previous years.” Unsa na nga previous years, gikan sa 2013?

Akong klarohon nga ang “existing ordinance” nga nagtugot paghatag og cash assistance sa mga senior citizens dinhi sa Cebu City nagtataw nga kadto ra nga mga botante dinhi sa siyudad ug nakabotar sa eleksyon niadto nga 2013.

Hangtud karon wa pa man mahimoi og kausaban, kun amendment ang ordinansa, mao nga unsaon man pagkadawat niadtong narehistro lapas sa tuig 2013?

Kon ang gipasabot nga makadawat mao ang mga senior citizens nga dugay na nga dinhi nagbotar sa Cebu City, apan sa 2013 dili pa sila senior citizen, pero karon nag-edad na sila og 60-anyos, aw makadawat ra sila kay botante man sila daan, dili sama sa uban nga transferee nga lapas na sa 2013 nagparehistro dinhi sa siyudad.

Duna pay gibutang nga ang pagpanghatag sa cash assistance ngadto sa kapin 7,000 ka seniors karong Oktubre 25 “will cover amounts from previous years.”

Nagpasabot ba nga ang seniors nga dugay na nga wa mahatagi og cash assistance ug makadawat na karong Oktubre 25, ang ilang makubra tag P12 mil kada tuig gikan niadtong 2013 hangtud ron? Unta, dunay mas klaro nga inpormasyon nga ihatag kabahin niini.

Ang Public Information Office (PIO) ug ang Office of Senior Citizens Affairs (OSCA) mopublikar gyud unta sa kopya sa executive order nga gipirmahan sa mayor, o kaha mohatag og pagpasabot kay daghan gyud ang nalibog.

Bisan si Chito Aragon, executive officer sa opisina ni Konsehal Jun Alcover nga maoy pangulo sa Senior Citizens Commission, mitataw nga dili pa gyud mahatagan og cash assistance kadtong mga senior citizens nga narehistro ug nakabotar lang lapas sa tuig 2013, kay wa pa mahimoi og amendment ang ordinansa.

Mao nga tambag nako sa mga senior citizens, sutaa gyud usa ninyo sa OSCA aron dili kamo mabawo ug masagmuyo unya.