Mayor Baricuatro nitubag sa pasangil

CEBU, Philippines — Subling nitataw ang mayor sa Lungsod sa Pinamungajan Glenn Baricuatro nga walay irregularities sa costing ug presyo sa pagpatukod sa P1.153 milyon nga comfort room sa lungsod.

Nitubag si Mayor Baricuatro human si Gobernador Pamela Baricuatro pinaagi sa Pam Baricuatro -The People's Governor Facebook page ni-post og recorded video sa pagsusi sa gobernador sa kontrobersiyal nga CR sa Pinamungajan.

Sa maong video, ang gobernador nitumbok sa pipila ka nakita niya nga "red flags" sa maong proyekto gikan sa petsa kon kanus-a kini unta mtapos.  Base sa project billboard nga gi-post kilid sa maong CR ang nakalatid nga completion date August 20, 2025 apan hangtud karon giingong 75 porsyento pa kini nga nahuman ang maong proyekto.

Matud usab ni Baricuatro nga ang contractor nga Dinha RBS Construction and Supply Inc. dili mao ang gahimo nga proyekto.

"Gigamit ra ang iyahang lisensiya noh, ang nagtukod ani usa ka konsehal nga amigo sa Mayor", butyag ni Gobernador Baricuatro.

Gibutyag sa gobernador nga iyang nasayran nga giilisan na og mahalon nga bowl ang CR aron mohaom sa kapin P1 milyon ang gasto.

Sa iyang tubag, si Mayor Baricuatro nagkanayon kini nga ang Facebook dili maoy saktong lugar o appropriate forum aron ipadangat ang maong isyu diin makahatag lang kini og unduly influence sa publiko.

Matud ni Mayor Baricuatro nga ang akusasyon sa gobernador walay kamatuoran ug walay basehan.

Ang maong proyekto gipundohan, giaprobahan ug gi-monitor sa Department of Interior and Local Government (DILG).

Ang pundo nga gigamit sa maong proyekto subsidy sa DILG ngadto sa LGU isip usa ka Seal of Good Local Governance (SGLG) awardee pasabot nga wala maggikan sa LGU ang pundo.

Ang DILG maoy nihatag sa LGU sa Pinamungajan og checklist sa mga proyekto nga buot niining ipatuman gamit ang P1.153 milyon nga pundo nga gihatag sa ahensiya.

Subay niini, gipili sa LGU ang pagpatukod og all gender public comfort rooms gikan sa listahan sa mga proyekto nga gipilian.

Ang documentary requirements laki pna na ang plano ug specification sa gipili nga proyekto ang gisumiter sa LGU ngadto sa DILG ug malamposon usab kini nga nipasar sa two-level review sa ahensiya gikan sa provincial office sa DILG hangtud sa regional office niini. (BANAT NEWS)