Eskuylahan sa Inayagan dili magamit

CEBU, Philippines — Wa na pabalika ang mga tinun-an sa Inayagan National High School human kini nakita ang mga nangliki nga bahin sa ilang mga school buildings human sa kusog nga linog niadtong Septembre 30 nga magnitude 6.9. Hinungdan nga gisuspenso una ang pipila ka klase samtang gipang inspeksyon ang mga tunghaan.

Gumikan niini si Mayor Valdemar Chiong nihimo sa pag inspeksyon sa TESDA Center ug Bahay Silangan sa Barangay Inayagan nga iya sa probinsya sa Sugbo. Ang mao nga edipisyo ang wala pa kini gamita.

Ang kagamhanan sa Naga nihangyo sa probinsya sa Sugbo nga ila una kining temporaryo nga gamiton aron kasudlan sa mga tinun-an nga apektado sa linog.

Ang Inayagan National High School ang wala na gamita sa kabalaka nga adunay dili maayong mahitabo diin ilang nakita nga dili kini luwas. Sa laing bahin, gipahibalo sab ni Mandaue City Mayor Thadeo Jovito "Jonkie" Ouano nga magpadayon pa gihapon nga walay klase sa mga pribado ug publikong tulunghaan sa Siyudad sa Mandaue sa Lunes, Oktobre 20 hangtod sa Biyernes, Oktobre 24, 2025

Temporaryo nga gisuspenso ang face to face nga klase ug gipatuman ang asynchronous method isip alternative modes sa pagtuon sa mga bata.

Aron sab mahatagan og panahon sa mga kabataan ug mga ginikanan nga mawagtang ang gibati nilang kakulba tungod sa linog ug mga aftershocks samtang gihimo pa ang inspeksyon sa tanang school buildings kung luwas gamiton.

Kahinumdoman nga dunay kapin 70 ka mga estudyante sa Mandaue ang gitabang dihang nangalisang sila sa aftershock niadtong Oktobre 13 samtang silang nagklase.  IBM BANAT NEWS