Lalaki mi-joy ride sa awto, gidakop
CEBU, Philippines — Gidakop ang usa ka lalake kay giingong nangarnap og sakyanan nga gi-park diha sa Sitio Manga, Barangay Punta Princesa, dakbayan sa Sugbo niadtong Huwebes sa gabii, Oktubre 16, 2025.
Ang dinakpan mao si Heaven Cent Tripoli, 24, nagpuyo sa Sitio Manga, Barangay Punta Princesa.
Samtang ang biktima mao si Jezriel Galvez Abela, 35 anyos, nagpuyo sa Sitio Manga, Barangay Punta Princesa ning siyudad.
Sa impormasyon sa Cebu City Police Office(CCPO) ang suspek ug biktima manag silingan ra sa maong lugar.
Base matod pa sa pangangkon sa suspek nga nakainom siya ug nakit-an niya ang sakyanan nga nag-park. Giablihan kini sa suspetsado ug iyang nakit-an nga nag-ungot ang yawe maong iyahang gipadagan. Nakabantay ang biktima ug daling nangayo og tabang sa kapulisan hinungdan nga kini gi-flash alarm. Sa pagmaneho sa suspek nabangga kini sa usa ka motorshop sa JM Basa Street, Barangay Pahina Central. Nanawag dayon sa Traffic Enforcement Unit(TEU) tungod sa maong traffic accident ug dali kining girespondehan. Giingong dunay nag Facebook Live, nakita sa biktima nga iyaha kining sakyanan maong niadto dayon kini sa lugar.
Ang biktima maoy nidakop sa suspek. Kasong kalapasan sa Republic Act 10833 kun New Anti-Carnapping Law ang ipasaka batok sa suspetsado. IBM BANAT NEWS
- Latest















