Mihingan og bati’g nawong, gipadakop

CEBU, Philippines — Usa ka uyoan ang gibalhog sa prisohan human gireklamo sa mga menor de edad nga mga pag-umangkon kay matud pa gitulisok sila ug mihingan nila og mga ‘bati'g nawong’ diha  sa Barangay Bonbon, Dakbayan sa Sugbo niadtong Martes sa udto, Oktubre 15, 2025.

Ang gireklamo nga uyoan mao si alyas Caloy, 35,  samtang ang mga biktima 9 anyos nga batang babaye ug 13 anyos nga batang lalake. Pulos nagpuyo sa naasoy nga dapit ang pag-umangkon ug uyoan.

Ang nagdakop sa dinakpan kay mga tanod sa maong barangay.  Sa impormasyon sa Malubog Police Station 12 Cebu City Police Office ang dinakpan gidakop pinaagi sa citizen's arrest human niya gitulisok matod pa ang duha ka mga bata.

Ang batang kalake giingong natumba ba sa pagtulisok sa iyahang uyoan samtang ang batang babaye giingnan matud pa og bati'g nawong.

Nisumbong ang duha ka batan-on sa ilahang ginikanan labot sa gibuhat sa ilahang uyoan.  Niadto sila sa Barangay Bonbon ug nagpakitabang nga miresulta sa pagkasikop sa uyoan.  Hinoon, ang mga reklamante dili na mopasaka og kaso batok sa dinakpan. IBM  BANAT NEWS