Amahan nihulga sa iyang pamilya, gidakop

CEBU, Philippines — Gitanggong sa bilangguan ang usa ka amahan human gikatahong iyang gihulga nga patyon ang iyang pamilya kung di niya makit-an ang iyang anak nga menor de edad nga babaye niadtong Huwebes sa gabii.

Nahitabo kini sa usa sa mga barangay sa Dakbayan sa Talisay. Ang suspek usa ka  33 anyos nga estambay. Samtang ang reklamante mao ang iyang kapuyo.

Apan nasuta sa imbestigasyon sa kapolisan nga ang gipangita sa suspek kinamaguwangang anak nga babaye, iyaha diay kining gisigehan og molestiya.

Ang iyang kapuyo maoy nidala ang ilang anak aron ikustodiya sa City Social Welfare and Development Office (CSWDO) tungod sa alegasyon nga gihilabtan kini sa naulahi.

Ang inahan sa bata wala mosulti sa suspek kung asa ang ilang anak samtang giproseso sa mga otoridad ang pagpasaka og kaso batok sa amahan sa bata.

Ang inahan nipasumangil lang sa suspek nga gidala niya ang anak ngadto sa social worker tungod aduna kini kakulian sa laing menor de edad.

Apan pagkasayud sa suspek ani, nasuko kini ug mibuhi og estorya nga iyang patyon ang iyang kapuyo lakip ang tulo nila ka gagmay pa nga anak.

Gumikan sa kahadlok ni alyas Jessa nigawas kini sa ilang pinuy-anan ug nagpatabang sa kapolisan hinungdan sa pagdakop sa iyang kapuyo.—Gabriel Bonjoc/IBM

Alcover: Kinsay nangolekta'g P6,000 sa Night Market?

Taliwala sa mga isyu ug kalibog nga naglibot sa operasyon sa Colon Night Market, giklaro sa Cebu City Treasurer’s Office nga sukad pa sa miaging tuig, arkabala ra nga P50 matag adlaw ang ilang ginadawat gikan sa mga stalls niini.

Sukwahi kaayo kini sa sa report nga nadawat ni Konsehal Pastor “Jun” Alcover nga adunay gipangkolekta nga P6,000 nga abang matag tindahan sa night market.

Sa pakighinabi sa Cebu City Treasurer Emma Villarete human sa hangyo sa City Council nga susihon ang miaging mga remittances sa night market nga giatiman sa GASA sa Gugma Board, nakita nga P50 ra matag gabii ang bayad sa matag stall nga gitawag og arkabala.Nasuta usab ni Villarete nga dili ang siyudad o ang barangay ang nagbayad sa kuryente sa night market.

“The only thing that we received with the night market before is only the Arkabala which is the P50 for the food and P30 for non-food (stalls),” matud pa ni Villarete.

Karong tuiga, ang isyu bahin sa GASA nga wala pa makabalik sa pagdumala  sa night market operations,  maoy hinungdan sa mainiton nga diskusyon sa konseho, ilabina kang Konsehal Pastor “Jun” Alcover nga maoy Chairman sa Committee on Markets.

Gibutyag ni Villarete nga ang matag stalls kausa ra mokuha og special permit nga nagkantidad og P2,500 aron maninda gikan Oktubre 16 hangtod Disyembre 31, 2025, lahi pa gyud ang arkabala nga P50 kada adlaw.

“Di lang pareha last year nga simple Arkabala lang jud,” matud pa ni Villarete.

Gipasabota ni Villarete nga ang arkabala gisuportahan sa usa ka tax ordinance nga nagpasabot nga kini maoy adlaw-adlaw nga abang alang sa mga dili permanente nga vendors. “I don’t know what happened before nganong wa jud sila mokuha og special permit, but now amo jud silang gi request to get a special permit,” dugang pa ni Villarete.

Bahin sa report nga nadawat ni Alcover nga adunay nangolekta og P6,000 matag bulan kada stall, giklaro ni Villarete nga wala siya’y kalibotan o bisan ang CTO bahin niini.

“Wala nakoy idea ana kay ang amoa is only on the operation of their business as to the area, kinsa ga manage, kay buot hunahunaon ang Colon is a public road man,” matud ni Villarete. Tungod ani, gisaway ni Alcover si Mayor Nestor Archival nga padayung wala moaksyon bahin ani, nga iyang gitawag nga “unjustifiable” ug gitawag niyang “syndicated.”

Pipila ka adlaw sa wala pa ang maong pamahayag, gipasabot ni Archival nga dili siya interesado nga ipahunong ang operasyon sa night market hangtod dili magkatigom ang GASA sa Gugma Board, sumala sa giingon sa City Council. Nagduha-duha sab si Archival sa GASA Board tungod sa report nga dugay na kining wala makahatag og stall rental fees sa siyudad. Apan para ni Alcover dili man katungdanan sa GASA Board ang pagkolekta sa abang kay basis a ordinansa, policy-making body ra kini ug dili kolektor.

Ang CTO matud pa ni Alcover maoy responsable sa pagkolekta pinaagi sa arkabala, diin matag stall mobayad og P25 hangtod P50 matag adlaw. Apan matud pa niya, imbes nga sa GASA tutokan, mas tan-awon sa mayor ang report nga ang mga organizer sa Colon Night Market maoy nagpakolekta aning tag P6,000 rental fees matag stall. Dugang pa ni Alcover, base sa ordinansa, ang mayor mismo maoy Chairman sa GASA Board ug dapat siya ang mosusi sa maong mga isyu sa koleksyon.

Matud pang Alcover pagpaabang sa mga pwesto sa dalan kadudahan tungod kay kabahin man kini sa yuta sa gobyerno. — /IBM (BANAT NEWS)