Ban sa importasyon gilibkas sa DA

CEBU, Philippines — Gilibkas sa Department of Agriculture (DA) ang temporaryong pagdili sa pag-angkat sa mga domestic ug wild birds gikan sa unom ka nasod nga kaniadto apektado sa pagkaylap sa avian influenza.

Kini human si Agriculture Secretary Francisco P. Tiu Laurel Jr. mipirma sa mga memorandum order nga nagtugot sa pagtangtang sa ban sa importasyon gikan sa Azerbaijan, Kazakhstan, Saudi Arabia, Slovenia, Sweden, ug sa Kelantan ug Sabah, Malaysia.

Ang maong ban gipatuman kanidto gumikan sa mga taho sa highly pathogenic avian influenza (HPAI) sa nahisgutang mga nasod. Apan matud sa DA, nasulbad na ang mga kaso gikan sa mga maong dapit ug wala nay bag-ong outbreak, hinungdan nga gipasig-uli ang pag-angkat sa poultry shipments.

Dugang pa sa DA halos wala na usab risgo sa importasyon base sa ebalwasyon sa Bureau of Animal Industry ug sa mga opisyal nga taho sa veterinary authorities.

Ang pagtangtang sa ban magsakop sa tanang buhing domestic ug wild birds, lakip na ang mga gibuhi sa zoo, nga tugotan nga makasulod sa Pilipinas subay sa mga sanitary ug phytosanitary regulations.

"Lahat ng mga naaprubahang transaksiyon ng mga nabanggit na kalakal ay dapat nakasunod sa umiiral na mga patakaran at regulasyon ng Department of Agriculture," sumala sa direktiba sa DA. — /IBM (BANAT NEWS)