12 durugista nadakpan
CEBU, Philippines — Dose ka mga durugista ang nangadakpan sa sagunson nga operasyon sa kapolisan batok sa ilegal nga drugas sa Syudad sa Talisay ug sa Mandaue City, samtang mokabat na P769 milyones ang balor sa ilegal nga drugas nga nasakmit sa Central Visayas ning tuiga.
Unang operasyon gihimo didto sa sitio Kilawan, Barangay Tanke diin usa ka alyas Tope, 48 anyos nga usa ka E-bike drayber ang namaligya og nakuhaan og shabu nga nitimbang og 5.40 gramos nga adunay balor nga P36,720.
Sa mao gihapon nga lugar, nadakpan si alyas Blade, 39 anyos nga namaligya ug nakuhaan og shabu nga nitimbang og 5.15 gramos nga balor nga P35,020.
Niadtong Domingo sa kadlawon nasikop si alyas Joking, 18 anyos nga usa na ka High Value Individual (HVI) didto sa Purok Atis, Barangay San Roque nga nakuhaan og 5.15 gramos nga balor P35,020 ka pesos.
Mga alas 3:15 sa kadlawon nakuha ang duha ka manuyopay nga sila si alyas John, 34, ug si alyas Isidro, 37, sa sitio Sawsawan, Barangay San Roque
Samtang lain sab nga manuyopay ang nasikop didto sa Purok Kitong, sitio Sawsawan, Barangay San Roque niadtong alas 4:30 sa kadlawon ug nadakpan si alyas Jason, 32 anyos nga usa ka panday.
Ang mga dinakpan nagtapok sa prisohan samtang nagpaabot nga mapasakaan og kaso may labot sa ilegal nga drugas.
Samtang sa Mandaue City Police Office (MCPO) sagunson sab nga nadakpan ang laing unom ka durugista gikan sa Barangay Opao.
Sa pikas bahin, gikan sa Enero 1 hantod sa Septembre 30, 2025, ang Police Regional Office(PRO)-7 nakapahigayon og 6,181 anti-drug operations nga miresulta sa pagkasikop sa 7,191 indibidwal nga nalambigit matod pa sa illegal nga drugas ug nasakmit ang P769 million nga balor sa illegal nga drugas.
Apil sa nasakmit mao ang 112.51 kilograms shabu, 2,604 grams nga pinaugang dahon sa marijuana, 3 grams sa kush, 14, 021 marijuana plants, 10 sticks, 250 grams sa cocaine ug 60 tablets sa ecstasy.
"These accomplishments represent lives saved and communities made safer. I commend our operating units for their consistent efforts and the seamless coordination among our intelligence, operations, and community relations teams to ensure that every effort counts toward a drug-free region," sigon ni PRO-7 Regional Director Police Brigadier General Redrico Maranan.
"Every person we help steer away from the path of destruction toward rehabilitation is a testament to our commitment to protect and rebuild communities. We are not just enforcers of the law — we are catalysts for change," ni Maranan pa.
Ang malampuson nga anti-drug operation sa PRO-7 nagpakita sa wala'y paglubas nga partnership sa kapulisan, local government units ug katawhan sa Central Visayas. IBM BANAT NEWS
- Latest
