Mandaue mangolekta na og bayad sa mercado

CEBU, Philippines — Mangolekta na og bayad sa mosulod nga mga baligya sa merkado publiko sa Dakbayan sa Mandaue sa higayon nga mapopos na ang gipatuman nga moratorium hangtud sa Disyembre 2025.

Kini ang gipadayag ni Konsehal Benjamin Basiga, chairman sa committee on market sa konseho sa siyudad.

Matud ni Basiga nga gipatuman ang moratorium sa pagpangolekta sa bayranan sa mosulod nga mga baligya sa merkado publiko dihang gisanong ni Mayor Thadeo Jovito “Jonkie” Ouano ang hangyo sa mga manindahay.

Gipaniguro ni Basiga nga dili angay mabalaka ang mga manindahay sa himuong pagpangolekta sa kagamhanan tungod kay mangita sila og mga paagi nga dili mabug-atan ang mga manindahay.

Si Basiga nagkanayon nga sa kasamtangan ilang gihimo ang pagsusi sa kantidad sa gikolekta nga balayranan sa mga mosulod nga baligya sa Carbon Market sa Siyudad sa Sugbo ug ingon man sa merkado publiko sa Siyudad sa Lapu-Lapu

Matud usab ni Basiga nga ilang gitan-aw karon nga ang labing ubos nga kantidad nga gikolekta sa nahisgotan nga mga lokal nga kagamhanan maoy posible nga ilang basehan.

Gikataho nga ang pagpangolekta og bayad sa mga mosulod nga baligya sa merkado publiko sa Dakbayan sa Mandaue pinasikad kini sa ordinansa sa niaging administrasyon.

Ang nahisgotang ordinansa gitipigan lang diin wala kini ipatuman sa niaaging administrasyon.

Ubos sa administrasyon ni Ouano ilaha kining gitinguha nga ipatuman apan ilang paningkamotan nga dili usab kaayo mabug-atan ang mga manindahay sa kantidad nga ilang kolektahon. BDB BANAT NEWS