Quimonda girekomenda nga bakantehan

CEBU, Philippines — Girekomenda nga kinahanglan nga bakantehan ang Quimonda I.T. Center sa North Reclamation Area sa Dakbayan sa Sugbo aron nga ipaayo ang edipisyo sulod sa tulo ka buwan.

“Kung imong tan-awon ang structural [building], risky gyud”, matud ni Konsehal David “Dave” Tumulak, tsirman sa Cebu City Disaster Risk Reduction and Management Council.

Ang CDRRMC uban sa Office of the Building Official ug Department of Engineering and Public Works nagpahigayon og hiniusang pakisusi sa unom ka andanda nga edipisyo kagahapon human nakadawat og taho nga daghan ang mga nakita nga mga kadaot ug mga liki sa istraktura human sa pagtay-og sa 6.9 magnitude nga linog nga niigo sa Sugbo niadtong Septiyembre 30, 2025.

Si Tumulak nagkanayon nga base sa rekomendasyon sa mga structural engineers nga ipaubos ngadto sa lawom nga imbestigasyon human nasuta nga molihok ang maong edipisyo bisan og walay linog.

Matud ni Tumulak nga adunay mga pagduda nga nakabaton na og kadaot ang edipisyo sa wala pa nahitabo ang ulahing linog.

Niadtong 2013 ang Probinsiya sa Bohol ug Sugbo gitay-ong kini sa 7.2 magnitude nga linog.

Gikataho nga ang kahimtang sa edipisyo daghang angayan nga trabahuon aron nga mabalik ang integridad sa istraktura.

Gipatawag na ang mga artkitekto ug mga kanhi structural engineer sa maong edipisyo aron makatabang sa mga pamaagi sa pag-ayo.

Nagsugod na usab og pagpanghipos ang mga empleyado sa ilang mga importante nga mga dokumento aron mapadayon gihapon ang ilang judicial nga trabaho pinaagi sa online. BDB BANAT NEWS