Traffic enforcers sa CCTO dunay quota?

CEBU, Philippines — Tapulan mao nga gitaktak sa trabaho kadtong traffic enforcer nga nag-viral sa social media nga gisunog ang iyang uniporme agi og pagprotesta tungod sa gihulagway niyang dili makiangayong rason sa pagtangtang kaniya sa serbisyo.

Giklaro ni Raquel Arce, labaw sa Cebu City Transportation Office ang isyu kabahin sa gitaktak nga traffic enforcer nga si Jemmer Bacon nga mipasangil nga ang rason sa pagtaktak kaniya – gamay ra siya og nadakpang traffic violators.

Gihimakak kini ni Arce, matud pa niya gitaktak kini sa serbisyo tungod sa dili maayong performance sa trabaho.

Gihimakak sab niya nga nagpatuman sila og “quota system” sa mga traffic enforcers basis a gidaghanon sa ilang madakpang malapason sa trapiko.

Si Bacon, unom ka tuig nga pagpangalagad sa maong buhatan apan wala na gi-renew. Matud pang Arce, ang pag-renew gibasi kini sa Individual Performance Commitment and Review  sa  matag traffic enforcer.

Gipasabot usab niya nga natural nga kabahin sa performance assessment sa mga traffic enforcer ang pag-isyu og citation tickets tungod kay mao kini ang labing unang katungdanan gawas sa pagbantay sa dagan sa trapiko sa kadalanan sa syudad.

Suma pa ni Arce nga kasagaran nga mga traffic enforcers maka-isyu og labing menos nga 100 ka citation tickets sa tulo ka buwan apan si Bacon naka-isyu lang og 12 sulod sa maong tulo ka buwan nga sa ilang tan-aw n nagpakita nga wala siya magkugi sa trabaho.

Dugang pa ni Arce nga gi-assign sab kini isip patrol apan dili kini mismo nga mogawas sa sakyanan ug mobuhat sa iyang katungdanan.

Aduna say higayon nga ang kauban lang niini ang momaneho sa dagan sa trapiko ug magpabilin lang si Bacon sa iyang motor ug maglingkod hangtud nga mahuman ang oras  sa iyang duty.

“Attitude lang gyud, naa man gyu’y tawo nga tapulan,” pulong pa ni Arce.

Si Arce nagkanayon nga nataktak sab ang maong enforcer gumikan kay base sa rekord sa City Hall, wala na gyud kini malakip sa na-renew. (BANAT NEWS)