Vietnam Coastguard niduaw sa Sugbo

CEBU, Philippines — Niabot dinhi sa Sugbu ang Vietnam Coast Guard (VCG) Vessel CSB 8002 sa Pier 5, Cebu Port Authority, Cebu City kagahapong adlawa, Oktobre 6, senyasles sa pagsugod sa usa ka semanang joint maritime cooperation tali nila ug sa Philippine Coast Guard (PCG) nga ang tumong mao ang pagpalig-on sa regional cooperation ug maritime partnership sa duha ka nasud. Opisyal nga gi-welcome sa Coast Guard District Central Visayas (CGDCV), ang ilang pag-abot aron palig-unon ang hiniusang paningkamot sa duha ka mga coastguards aron mapalambo ang mutual understanding, maritime safety, ug regional security pinaagi sa mga kooperasyon.

Sa iyang welcome remarks, si CGDCV Commander Rear Admiral Agapito B. Bibat nagpasalamat sa ngalan ni PCG Commandant Admiral Ronnie Gil L. Gavan as mga bisitang Vietnamese.

Gihatagan usab niya og gibug-aton ang kahinungdanon sa bilateral cooperation ubos sa Association of Southeast Asian Nations (ASEAN) Coast Guard Forum (ACF), nga nag-ingon nga ang Pilipinas ug Vietnam adunay managsama nga katuyoan sa pagpauswag sa maritime safety, seguridad, ug pagpanalipod sa kinaiyahan sa Southeast Asia.

Sa iyang bahin, Si Vietnamese CG Region 2 Commander Major General Tran Quang Tuan, nagpasalamat sa PCG ug sa Sugbo sa mainitong paghangop kanila nga matud pa niya “living proof of the strong friendship, mutual trust, and close bonds” tali sa duha ka mga coast guards.

Ang CGDCV maoy host sa maong port visit dinhi sa siyudad sa Sugbo, diin sulod sa usa ka semana ang duha ka mga coast guards magpahigayon og courtesy calls, bilateral meeting, cultural ug sports exchange, ug joint exercises sa search and rescue, firefighting sa dagat, ug oil spill response.