Mga residente palikayon sa sinkholes

CEBU, Philippines —  Niisyu ang Mines and Geosciences Bureau Regional Office 7 (MGB-7) og Subsidence Threat Advisory sa Munisipyo sa Medellin, Cebu niadtong Oktobre 3, 2025, nunot sa kompirmadong pagtumaw sa sinkholes ug ground subsidence human sa bag-ohay lang nga 6.9-magnitude nga linog nga miigo sa Northern Cebu.

Sumala sa advisory, ang tanan nga mga barangay nga dunay sinkholes gi-classified ubos sa taas nga subsidence hazard rating, nga nagbutang ug seryoso nga risgo sa mga residente, imprastraktura, ug kabtangan.

Namatikdan sa MGB-7 nga ang linog posibling nakapa-destabilize sa yuta maong nangbutho ang mga sinkholes ug makita nga mga liki sa yuta sa pipila ka mga apektadong lugar, nga nagtimaan sa posibleng pagpalapad sa subsidence.

Aron masiguro ang kaluwasan sa publiko, gitambagan sa MGB-7 ang mga lokal nga opisyal nga higpitan ang pagsulod sa mga lugar nga adunay mga sinkholes ug mga liki pinaagi sa pagbutang og mga tape, babag, ug mga warning sign, ug ireport dayon ang parehas nga mga insidente sa ahensya.

Nagpasidaan usab ang mga awtoridad batok sa pagtabon o pagpuno sa mga sinkhole nga wala’y husto nga pagsusi, tungod kay ang paglihok sa tubig sa ilawom sa yuta mahimong mopagrabe sa pagkahugno ug hinungdan sa dugang nga kadaot.

Giawhag ang mga residente nga bantayan pag-ayo ang bisan unsang paglihok sa yuta, labi na pagkahuman sa kusog nga pag-ulan, ug likayan ang pagtukod sa mga istruktura duol sa mga apektadong lugar tungod sa peligro sa dugang nga pagkahugno.

Dugang pa nga girekomenda sa bureau ang paghimo og geotechnical nga mga pagtuon aron mahibal-an ang gidak-on sa bisan unsang mga langob o subterranean river systems ug aron mahibal-an ang husto nga solusyon sa engineering aron makunhuran ang mga peligro.

Gawas sa Medellin, ang MGB-7 niluwat usab og susamang advisories ngadto sa mga lokal nga kagamhanan sa San Remigio, Tabogon, Daanbantayan, ug Bogo City, nga adunay duha ka geological teams gikan sa MGB-7 ug sa Central Office nga gipakatap na aron sutaon ang landslide ug sinkhole-prone areas sa Northern Cebu.