Tulo ka Chinese nationals gipangita
CEBU, Philippines — Tulo ka mga Chinese nationals ang gipangita karon sa mga otoridad human nipagawas ang Regional Trial Court (RTC) Branch 5 sa Cebu City og warrant of arrest batok nila tungod sa kasong qualified theft.
Ang nalutsan og warrant mao silang Susana Yu Sing, Joseph Yu Sing, ug Imelda Sing Copo tungod sa kasong qualified theft ubos sa Article 310 sa Revised Penal Code.
Ang warrant gipirmahan ni Judge Ricky Jones Sanchez Macabaya niadtong Septembre 22, 2025, nagmando sa tanang law enforcers nga dakpon ang mga akusado, walay piyansa nga gitugot ang korte alang sa temporary nilang kagawasan.
Sa balaod, ang usa ka kaso mahimong itakda nga “not bailable” kung kini punishable by reclusión perpetua o life imprisonment kun lig-on ang ebidensya base sa Section 13, Article III sa 1987 Philippine Constitution ug sa Rule 114 sa Revised Rules of Criminal Procedure.
Ang qualified theft kun dako ang kantidad nga nalambigit mahimong silotan og reclusión perpetua.
Usa sa mga sakop sa Criminal Investigation and Detection Group–Central Visayas (CIDG-7) nga nakahinabi sa Banat News mibutyag nga usa ka private complainant nga paryente ra usab sa mga akusado ang nipasaka sa kaso tungod sa matud pa alegasyon nga pagkuha nila sa mga kabilin sa ilang mga ginikanan nga walay pananghid kanila.
Sa pagkakaron, padayon pa ang pagpangita sa mga suspetsado nga posible ra gihapon nga anaa sa Cebu tungod kay adunay sila’y mga property sama sa apartment ug condominium sa dakbayan.
“Magpahibalo lang ta sa publiko kung kinsa to pananglitan makit-an nila, pwede ra sila mo-contact sa number nga +63 949 803 4322,” dugang pa sa CIDG-7. IBM BANAT NEWS
- Latest
