Mga sinkholes nangbutho human sa linog

CEBU, Philippines — Dunay mga sinkholes nga naporma human sa 6.9-magnitude nga linog niadtong Septembre 30 sa amihanang Sugbu ilabi na sa San Remigio ug Daanbantayan,

Tungod, ang mga volunteer experts gikan sa Luzon nanganhi sa Cebu kagahapon (October 3) ug gi-inspeksyon ang maong mga sinkholes.

Base sa inisyal nga mga nadiskubrehan, 15 ka sinkholes ang nakit-an sa Sitio Maño, Barangay Maño, sa San Remigio town. Samtang sa Sitio Mayjo, Barangay Paypay sa Daanbantayan usa ka dakong sinkhole ang nakit-an nga gibanabanang tulo ngadto sa upat ka metros ang gidak-on sa bangag.

Ang 72-anyos nga mananagat nga si Manolo Tipait miingon nga ilang nadiskubrehan ang sinkhole diha sa baybayon niadtong Oktubre 1 sa buntag sa dihang ilang gisusi ang ilang mga sakayan human sa paglinog nianang gabii.

Matud pa niyang nakurat siya sa ilang nakitang bangag nga wala sukad niya makit-i sukad pa sa iyang pagkatawo, naa kini duol sa usa ka balay sa baybayon.

Pipila ka metros gikan niini, duna laing medium-sized sinkhole sa mismong gibarugan sa punoan sa lubi nga natumba nga gihiktan sa sakayan ni Tipait hinungdan sa pagkaguba niini.“Diring dapita igo jud ‘mi sa katalagman,” matud pang Tipait.

Duna pay daghang mga gagmay nga mga sinkholes nga nakit-an sa ilang palibot, gani ang usa niini nabuwasot ang iyang anak.

Si San Remigio Mayor Mariano R. Martinez mikompirmar nga sobra 100 sinkholes na ang natala sa ilang lungsod sud sa nanglabay nga mga katuigan, ug kini 11 bag-o lang pagkahuman sa linog.

“We’re still assessing. The ground continues to move,” matud pang Martinez kinsa miingon nga gimandoan na niya ang mga nagpuyo duol sa mga sinkholes nga mobakwit lang una.

Matud niya, ang  San Remigio direktang sumpay sa fault line nga konektado sa Dakbayan sa Bogo diin nahimutang ang epicenter sa maong linog.

Usa sa mga sinkhole nga nakapabalaka mao kadtong duol sa  usa ka eskuylahan sa Hagnaya. Ang uban aning mga sinkholes adunay tubig sa ilawom maong nag-anam kini og kadako ang bangag.

Si Ted Esguerra, usa ka expedition and rescue doctor sa Philippine Mount Everest Team, kauban sa mga sakop sa Valenzuela City Disaster Risk Reduction and Management Office, ug Makita Powertools midokumento sa maong mga sinkholes.

Esguerra sa pakighinabi sa The Freeman miingon nga katong us aka sinkhole nga naa sa baybayon duol sa kabalayan, peligroso gyud kaayo. Nicholas Jon Malaga/IBM BANAT NEWS