Bana ug kabit gipadakop sa asawa

CEBU, Philippines — Gipadakop sa usa ka asawa ang iyahang bana ug ang giingong kakukalidang niini human niya nasakpan  sa sulod sa kwarto sa usa ka condominium sa Barangay Mabolo, siyudad sa Sugbo niadtong Huwebes sa hapon, Oktubre 2, 2025.

Ang asawa nag-edad og 42 anyos samtang ang iyahang bana 51 anyos ug ang giingong babaye ni kay 30 anyos.

Ang magtiayon  taga Barangay Subangdaku, Mandaue City ug ang giingong babaye sa bana taga Barangay Basak Pardo, Siyudad sa Sugbo.

Nasayran nga dugay na matud pa nagduda ang asawa nga ang iyahang bana dunay laing babaye hinungdan nga gisundan niya kini hangtud naabot sila sa maong condominium ug didto niya giingong nasakpan ang iyang bana ug ang matud pa babaye niini.

Hinungdan nga iyahang gidakop ug nangayo kini og tabang sa kapulisan sa Mabolo Police Station 4 Cebu City Police Office.

Giingong dugay na matud pa ang relasyon sa bana ug sa giingong babaye niini apan wala madeterminar kung kanus-a gyud gasugod.

Kasong Violence Against Women and their Children (VAWC) ug Concubinage ang ipasaka batok sa duha ka mga dinakpan. IBM BANAT NEWS