Mga kawani sa City Hall mitabang

CEBU, Philippines — Padayon ang pagtambayayong sa kagamhanan sa Dakbayan sa Sugbo aron nga makapadangat og tabang sa mga biktima sa Dakbayan sa Bogo, San Remigio, Medellin, Daanbantayan, Tabogon, Tabuelan, Sogod ug Isla sa Bantayan nga gitay-og sa magnitude 6.9 nga linog niadtong Setyembre 30, 2025. Ang nagkadaiyang departmento sa City Hall nagmugna og inisyatibo nga nga gitawag og “Pass the Hat” ug nakatigom sila og  P62,572 kun diiin gikan kini sa personal nga bulsa sa mga empleyado.

Sa post sa Facebook niadtong Huwebes ni Mayor Nestor Archival nagpasalamat sa mga empleyado nga mitampo. Madugang kini sa gitaganang P20 milyones sa siyudad.

Sa laing bahin, gihatod na kagahapon sa hapon ang mga ayuda nga giandam sa kagamhanan alang sa mga biktima sa norte kuyog ang 87 ka mga youth volunteers nga motabang sa pag-apud-apud niini ngadto sa mga biktima.   IBM BANAT NEWS