CCMC pabiling luwas human sa pagsusi sa obo

CEBU, Philippines — Giklaro ni Cebu City Mayor Nestor Archival nga walay naangkon nga grabeng kadaot ang dakbayan human gitay-og ang Sugbo sa 6.9 magnitude nga linog nga nahitabo sa alas 9:59 sa gabii sa Septiyembre 30, 2025.

Apan gipahibawo ni Archival nga gipagawas ang mga pasyente sa Cebu City Medical Center tungod sa kusog nga pagtay-og nga nasinati sulod sa edipisyo.

Bisan pa man sa pipila ka mga aftershocks, dali nga gipasusi ni Archival sa Office of the Building Official ang matag andana sa maong tambalanan.

Sa dihang kalit nga nibunok ang uwan ug kuwang ang mga gipangmuntar nga mga tents, dali sab nga gipasulod og balik ang mga pasyente sa una ug ikaduhang andana sa tambalan ug ang ang uban temporaryo nga nipahiluna sa Cebu City Fire Station.

Gipasulod og balik ang mga pasyente sa CCMC dihang namatikdan nga naundang ang aftershocks, apan gipahiluna lang kini sa unang andana.

Matud pa ni Archival nga wala na gikinahanglan ang evacuation center gumikan kay nasuta sa OBO nga pabilin nga luwas ang edipisyo aron nga makapadayon sa medikal nga operasyon.

Samtang, giklaro sab ni Archival nga wala siya makadawat og taho nga adunay structural damage ang Cebu South Coastal Road (SRP) Tunnel ug Mambaling Underpass.

Matud pa sa mayor nga nakasinati lang og pag-brownout ang CSCR Tunnel apan temporaryo kini nga gipasirado ngadto sa publiko aron nga ipaubos og structural assessment ug aron nga masiguro ang integridad ug kaluwasan sa mga motorista.

Sa laing bahin, gibutyag sab ni Archival nga wala makalikay sa kadaot ang Cebu City Hall gumikan kay nahugno ang pipila ka bahin sa kisame sa legislative building ug ang elevator giingon nga nagpakapaka atol sa linog niadtong Martes.

Bisan pa man sa ginagmay nga kadaot, padayon ang operasyon sa City Hall.

Giangkon sab ni Archival nga dili maato nga ang OBO lang ang mopahigayon og inspeksyon sa tanang edipisyo sa syudad gumikan kay lakip sab sa sutaon niini ang mga tunghaan mao nga nanawagan kini sa mga structural ug civil engineers nga tabangan ang kagamhanan sa Dakbayan sa Sugbo sa pagsusi sa mga edipisyo aron nga magiyahan ang kagamhanan kung luwas pa ba gamiton ang mga edipisyo sa siyudad. Alang sa mga interesado nga mga enhinyero nga andam nga motabang sa kagamhanan, mamahimo nga motawag sa City Administrator nga si Albert Tan sa 0918 818 8000.

Gikumpirmar sa Philippine Institute of Volcanology and Seismology (Phivolcs) nga ang magnitude 6.9 nga linog sa Sugbo maoy labing kusog nga natala sa lalawigan. Ang pagtay-og nga narehistro og Intensity 7 nga duol sa Bogo City nga mao ang epicenter sa linog nasinati sab hangtod sa Mindanao ug Bicol.

Nipasidaan ang mga otoridad nga magmabinantayon ug dili mokompyansa sa huyang nga mga istruktura ug posible nga madungagan pa ang mga masinati nga aftershocks. (BANAT NEWS)