Linya sa kuryente sa SRP papun-an

CEBU, Philippines — Gipresentar sa Visayan Electric Company (VECO) ang pagpalapad o pagdugang sa distribution line sa South Road Properties (SRP) ngadto kang Cebu City Mayor Nestor Archival tungod sa paspas nga pagsaka sa panginahanglan sa kuryente kun diin gikinahanglan na nga magdugang og mga linya aron malikayan ang pagkompromiso sa suplay.

Ang presentasyon gihimo atol sa coordination meeting uban sa mga aktibong locators sa South Road Property Management Office (SPRMO).

Si Michael Gonzales kinsa manager sa VECO Design Department mipakita sa phased implementation plan sa maong proyekto mipasabot nga ang konsumo sa kuryente sa SRP gilauman nga motaas maong gikinahanglan na mag-instolar og dugang mga linya.

Base sa impormasyon gikan sa Cebu City News, sugdan sunod semana ang pagtrabaho sa Phase 1 sa expansion plan nga maglakip og overhead distribution lines kun diin manukad kini sa atubangan sa Department of General Services (DGS) compound sa El Pardo paingon sa Filinvest.

Ang Phase 1 adunay gitas-on nga 1.5 ka kilometro nga bag-ong linya sa kuryente. Gilauman nga mahuman kini karong tuiga samtang ang kinatibuk-ang proyekto gilauman nga makompleto sa tuig 2026.

Gidawat ni Archival ang maong proyekto gumikan kay nakita niya nga gidesinyo kini alang sa komersyal ug residential nga mga kalamboan sa SRP apan nimando kini sa VECO nga tangtangon ang duha ka poste sa entrada sa SRP ug tun-an ang labing maayo nga paagi sa pagbalhin sa mga linya sa kuryente.Nisugyot sab kini nga mas labing maayo nga himoon nga underground ang pagbutang sa mga linya sa kuryente aron nga dili samok sa mata ang mga poste.

“Find a way, even if you have to put it underground. We won’t be upset. The lights will look much better, and the posts won’t be an eyesore,” suma pa ni Archival. (BANAT NEWS)