Weighbridge station sa CSCR magamit na

CEBU, Philippines — Nakumpleto na ang pagtukod sa modernong Cebu Cordova Link Expressway weighbridge station sa Cebu South Coastal Road (CSCR) human nga pormal nga gibendisyonan ang maong pasilidad nga gipanguluhan ni Cebu City Mayor Nestor Archival ug mga opisyal sa Cebu Cordova Link Expressway Corporation (CCLEC).

Ang maong pasilidad nagkantidad ngadto sa P70 milyones nga gidisenyo aron mapanalipdan ang viaduct ug CCLEX bridge ug mapugngan ang overloading sa mga trak nga moagi. Aduna kini kritikal nga papel alang sa pagmentinar sa integridad sa 8.9 kilometros nga CCLEX nga nagserbisyo sa liboan ka mga sakyanan matag adlaw. “Protecting these vital links is not only a matter of convenience. It is a matter of ensuring its long-term integrity and, more importantly, the safety of our people who rely on these roads daily,” tipik sa pulong ni Archival.

Ang pagtukod sa CCLEX weighbridge station subay kini sa Republic Act 8794 o ang Anti-Overloading Act of the Philippine diin pahamtangan og silot ang trak ug trailer nga nagkarga lapas 13,500 ka kilo.

Ang Cebu City South Road Properties Patrol Group nakatala og 436 ka mga sakyanan ilabi na ang mga dagkong trak ug trailer nga nalambigit sa overloading sukad pa niadtong Enero hangtud Agosto ning tuiga.

Matud pa ni Allan Alfon, general manager sa CCLEC nga dako og ikatabang ang weighbridge sa pagpakunhod sa maong mga insidente nga sagad hinungdan sa kahuot ug pagkalangay sa dagan sa trapiko. Ang maong pasilidad nigamit kini og Weigh-In-Motion (WIM) nga teknolohiya nga adunay Lineas quartz sensors nga nagtugot sa real-time nga pagsukod sa mga karga diin dili kinahanglan nga mohunong ang mga sakyanan o mga trak. Ang mga nag-overload nga mga trak ipaubos kini og beripikasyon sa static weighing station. Si Alfon nagkanayon nga gawas sa weighbridge station sa CSCR, kasamtangang gitukod ang weighbridge station sa bahin sa Cordova diin mahimo na kini nga magamit sa dili madugay. Magsugod sab ang operasyon sa weighbridge sa dakbayan sa dili pa matapos ang tuig 2025 ug gitahasan na sab ni Archival ang Cebu City Transportation Office nga maoy mangunay sa pagpatuman sa balaod inabagan sa 14 ka traffic enforcers nga gipakatap sa Land Transportation Office nga maoy manakop sa makalapas sa balaod. (BANAT NEWS)