Tulo ka unit sa heavy equipment sa Mabini ipabalik sa siyudad

CEBU, Philippines — Ang konseho sa Dakbayan sa Sugbo nanawagan sa pagbalik sa tulo ka unit sa heavy equipment nga gikatahong naa karon sa Barangay Mabini, usa sa mga bukirang barangay sa siyudad.

Kini gumikan sa kakuwang sa dokumento sama sa deed of donation.

Niadtong Martes, atol sa regular session sa konseho si Konsehal Sisinio Andales nipahigayon og privilege speech sa subling pagbukas sa isyu nga gidiskusiyonan niadtong pa’ng 16th Sangguniang Panlungsod.

Gihisgotan ni Andales nga niadtong sesyon sa Hunyo 25, 2025 gimando ni kanhi konsehal Rey Gealon ang pag-withdraw sa iyang resolusyon nga nagtumong sa pagdonar sa tulo ka heavy equipment, usa ka excavator, usa ka wheel loader ug usa ka road roller alang unta sa Barangay Mabini. Matud ni Andales nga ang pag-withdraw nahitabo human sa diskusyon nga nagtuki sa kaangayan, timing ug katuyoan sa maong donasyon.

Si Andales nagkanayon nga ang plano nga pagdonar ngadto sa Barangay Mabini nisangpot og “unjustified concern.”

Ug si kanhi konsehal Mary Ann de los Santos nisupak niini tungod kay ang maong mga ekipo gipalit unta alang sa city-wide maintenance ug public works nga sakop unta sa Department of Engineering and Public Works (DEPW).

Gibalik ni Andales ang teknikal nga panginahanglan sa maong procurement nga una nang gisang-at ni de los Santos sa niaging deliberasyon.

Apil sa isyu ang kakulang sa kapasidad sa barangay nga mag-operate ug magmentinar sa mga ekipo.

Si Andales nagkanayon nga nagkagrabe ang kabalaka gumikan kay ang procurement nahitabo sulod sa "operational budgetary realities".

Gisugyot ni Andales nga ipabalik ang tulo ka unit sa ekipo tungod sa kakulang og deed of donation ug deed of acceptance nga pirmahan unta ni kanhi Cebu City mayor Raymond Alvin Garcia.

Gisuportahan kini sa konseho ug nipasar og mosyon nga magmando sa Department of General Services (DGS) sa pag-imbestiga ug paghimo og kompletong report kabahin sa kahimtang ug readiness sa maong mga heavy equipment.

Atol sa diskusyon gipaklaro ni Konsehal Joel Garganera kong ang resolusyon ba nga mosuporta sa procurement sa maong equipment na-withdraw ni Gealon.

Gibasa ni Andales ang transcript sa deliberasyon ug gikompirmar nga gikuha ang resolusyon ug nagpasabot kini nga walay legal nga basihan ang maong procurement.

Gipadayag ni Andales nga adunay donasyon nga gi-forward sa Cebu City Legal Office ug kini naghatag og no-objection opinion. (BANAT NEWS)