Lima ka menor na-rescue sa CPPO
CEBU, Philippines — Na-rescue sa mga personnel sa Provincial Intelligence Unit ug Women and Children Protection Desk sa Cebu Police Provincial Office (CPPO) ug Cordova Municipal Police Station pinaagi sa pakig-alayon sa Cebu PSWDO Social Worker ug WCPC-Visayas Field Unit-7 ang lima ka menor de edad sulod sa usa ka inn sa Barangay Poblacion, Lungsod sa Cordova niadtong Biyernes.
Ang maong operasyon niresulta usab sa pag-rescue sa usa ka 16-anyos nga dalagita nga Children in Conflict with the Law (CILC).
Base sa taho sa kapolisan nga ang 16-anyos giingong nang-recruit sa lima ka menor de edad alang sa sexual exploitation ug prostitution.
Giingong gipahimuslan sa 16-anyos ang lima ka menor de edad.
Atol sa operasyon na-recover ang usa ka P1,000 nga tinuod nga kwarta; 19 ka peke nga tag P1,000 nga nagsilbing boodle money; usa ka brown envelope nga gigamit nga sudlanan sa boodle money ug usa ka cellphone nga adunay blue casing.
Ang 16-anyos nga CICL ingon man ang lima nga na-rescue gidala sa Center for Women and Children sa Department of Social Welfare and Development Field Office-7.
Si Police Colonel Abubakar Udang Mangelen, Jr., CPPO officer-in-charge nagkanayon nga ang malamposong pagluwas sa mga menor de edad usa ka direct fulfillment nga mando ni Cebu Governor Pamela Baricuatro nga hatagan og prayoridad ang pagprotehir sa mga bata ug sumpuon ang ang exploitation sa Probinsiya sa Sugbo. (BANAT NEWS)
- Latest
