Na-ungo sa porn

CEBU, Philippines — Usa ka  17-anyos nga lalake ang gipadakop sa silingan  human kini nasakpang nagduwa sa iyang kinatawo atubangan sa usa ka PWD diha sa usa sa mga barangay sa North District  sa dakbayan sa Sugbo niadtong Lunes sa udto, Septembre 22, 2025.

Ang gipadakop nga batan-on usa ka tinun-an ug nag-abang sa kwarto sa boarding nga iya sa pamilya sa biktima. Ang biktima usa ka 30 anyos nga babayeng Person with Disability (PWD).

Gidemalas ang suspek kay matud pa mismo ang amahan sa biktima maoy nakasakop kaniya sa iyang malaw-ay nga gibuhat.

Sa impormasyon sa Mabolo Police Station 4 naabtan sa amahan sa biktima ang iyahang anak kauban ang dinakpan sa sulod sa kwarto ug hubo na pareho ang ilang suot sa ubos nga bahin.

Sigon pa sa amahan ngadto sa kapulisan gipangita niya ang iyang anak sa maong boarding house sa ilang pamilya.

Ug sa usa sa mga bakanteng lawak, didto niya naabtan ang duha. Naaktuhan gyud  matud pa sa amahan nga nagduwa sa iyang kinatawo ang suspek atubangan sa iyang anak supak sa kabubut-on sa naulahi.

Ang biktima dili makaestorya tungod sa iyang kakulian. Samtang nasayran nga ang suspek magsaulog unta sa iyang ika-18 anyos nga adlaw'ng natawhan karong adlawa.

Wala hinuon matud pa gihilabtan ang biktima. Dili hubog ang suspek apan gituohang na-addict kini og sige’g tan-aw og pornograpiya.

Desidido matud pa ang amahan sa biktima nga mopasaka og kasong Acts of Lasciviousness sa dinakpan. IBM  BANAT NEWS