Kapitolyo mo establisar og community-based rehab program

CEBU, Philippines — Ang Probinsiya sa Sugbo nagplano sa pag-establisar og community-based rehabilitation program lukop lalawigan.

Atol sa labing una nga  “Community-Based Rehab Summit” niadtong Septiyembre 22, 2025 sa probinsiya si Dr. Nikki Catalan, Capitol health consultant nagkanayon nga ang rehabilitasyon nga aspeto sa healthcare maoy usa sa wala kaayo mahatagi og pagtagad.

 Ang municipal health officers (MHOs) ug barangay health workers (BHWs) ipaubos sa basic training sa rehabilitation therapy, physiatry ug uban pang areas alang sa dali nga pagpaayo sa mga pasyente sama sa mga stroke survivors nga naglisod og pangita og serbisyo alang kanila ngadto sa rural communities.

Ang rehabilitation medicine o physiatry, usa ka specialty nga nagtutok sa pagpablik sa function sa mga disabled nga mga indibidwal tungod sa sakit, disorder, or injury niini.

Naghatag kini og multidisciplinary care nga makatabang sa physical, emotional, vocational, ug social aspects sa pag-recover sa pasyente.

Samtang si Gobernador Pamela Baricuatro nagkanayon nga ang maong programa maoy labing una sa Sugbo hilabina nga ang rehabilitation wala makita nga dinalian nga aspeto apan dako ang matabang sa mga pasyente nga buot magpaayo sa ilang sa mga sakit.

Gikataho nga 160 ka bag-ong nahire nga mga nurse sa Probinsiya sa Sugbo ang gipaubos karon sa duha ka adlaw nga Basic Life Support (BLS) training isip kabahin sa pagpalig-on sa health services sa probinsiya karon.

Ang duha ka adlaw nga training sugod niadtong Septiyembre 23, 2025 hangtud kagahapon nagtutok sa nagkadaiyang basic life support sama sa cardiopulmonary resuscitation (CPR), foreign body airway obstruction management, rescue breathing ug uban pa.

Matud ni John Noel Enriquez, program facilitator ug manager sa Disaster Risk Reduction and Management in Health (DRRM-H) sa Provincial Health Office nga ang maong training nagsubay sa guidelines sa Heart Association 2021.

Ang mga eksperto gikan sa Department of Health (DOH)-7, Cebu Provincial Hospital- Carcar , Cebu South Medical Center, Philippine National Police ug uban pa ang niapil pag-facilitate sa mga sessions sa maong training. BDB BANAT NEWS