PRC ug kapitolyo nag-alayon alang sa blood program

CEBU, Philippines —  

Ang Philippine Red Cross (PRC) ug ang Cebu Provincial Government nagpinirmahay kagahapon og memorandum of agreement (MOA) alang sa Blood Samaritan Program, diin gibana-bana nga dunay project cost nga P2 million.

Si Philippine Red Cross (PRC) chairman ug CEO

Richard Gordon ug Cebu Governor Pamela Baricuatro mao ang nipirma sa maong kasabutan.

Ang Blood Samaritan Program gitumong aron pagluwas og kinabuhi sa mga kabus nga way katakus sa pagkuha og libre ingon man luwas nga dugo.

Subay niini ang provincial government ni turned over sa P1,213,200 nga checke ngadto sa PRC alang sa Safe Card Registration Program, nga gipaabot nga maka benepisyo sa dili mominus sa 1,111 ka mga responder gikan sa Cebu Province.

“When we improve healthcare, we are not only treating sickness, we are giving families peace of mind, children the chance to grow healthy, and communities hope for the future. But no one can do this alone. Collaboration is the key to reaching more people, responding faster, and serving better,” suma pa ni Baricuatro.

Gipahibawo usab sa PRC nga ilang palig-onon ang blood supply distribution ngadto sa tanang government hospitals dinhi sa Cebu Province. Si governor Baricuatro mapasalamaton sa mga programa sa Red Cross ug nipasalig nga ang probinsya kanunay makig-alayon alang sa ilang programa.

Samtang si Gordon, mapasalamaton usab sa gubernadora tungod sa programa niini alang sa panglawas sa mga Sugbuanon.

Nagkanayon usab si Gordon nga ilang tinguha nga makatukod ug kaugalingon nga tambalanan ang Red Cross sa sunod tuig.

Samtang gihimo usab ang pagpili og mga bag-ong opisyales sa PRC Cebu Chapter ug kini naglangkob nila ni Jacqueline Claudine U. Roble, William Acosta, Anton Mari Perdices, Alfred Reyes, Antonio Ynoc, Ronald Po, Christian Paro-an, Bryan Yap, Rodrigo Taneda, Jay Yuvallos, Juan Antonio Bernad, ug Kirk Bryan Repollo.

Ang mga bag-ong napili nga mga opisyal nanumpa atubangan ni Gordon sa wala pa kini nibalik sa kaulohan. (BANAT NEWS)