300 ka panimay matauran og tubig
CEBU, Philippines — Dugang 300 ka panimay diha sa barangay Busay ang maka benepisyo sa bag-ong water project sa Metropolitan Cebu Water District MCWD.
Si Cebu City Mayor Nestor Archival nagpaabot nga sulod sa duha ka buwan, ang mga residente sa barangay Busay ang makatagamtam na og limpyo nga running water pinaagi sa bag-ong proyekto sa MCWD.
Kining maong kalambuan gipahibawo human sa gihimong pipe-laying ceremony nga gitambongan ni mayor Archival diha sa National Housing Authority (NHA) Chapel niadtong Lunes.
Giklaro ni Archival nga ang maong water project makahatag na og kaharuhay sa mga residente sa maong dapit nga sa dugay na nga katuigan nagkuwang og supply sa tubig.
Adunay 330 ka panimay ubos sa Busay Heights Home Owners Association (BHHOA), diin kadaghanan niini ang nagsalig lang sa matag adlaw nga water deliveries gikan sa Department of Public Services (DPS).
Si BHHOA Assistant Secretary Miraflor Miscala nipadayag nga bisan og gihatagan og unang pagtagad ang NHA community, apan ang ubang mga sitio ang nagpaabot usab sa ubang sitio nga wala pay koneksyon.
Samtang si Archival agig tubag nipasalig nga andam siya nga dalhon ang maong concern ngadto sa MCWD aron kadtong naa sa gawas sa BHHOA dili usab mapasagdan.
Ang General Manager sa MCWD Edgar Donoso, miingon nga ang maong pagbutang og mga linya sa tubig mahuman sulod sa 105 ka adlaw.
Dugang pa ni Donoso nga sa higayon nga mahimutang na ang initial connections, ang MCWD mopadangat usab sa ilang serbisyo ngadto sa ubang mga kasikbit nga sitio ug tinguha nila nga maabot ang mga layo na nga area.
“Tagaan nato tubig ang maagian, ang ato lang gipasudlan na nato og tubo para masumpayan sa mga sitio-sitio pero mga by December or even before December ato naning paningkamotan nga mahuman. Atong paningkamotan daghan maka avail og serbisyo sa MCWD bisan sa kabukiran na,” segun pa ni Donoso. (CEBU NEWS)
- Latest
