JO ug casuals sa Mandaue City Hall mag ATM na

CEBU, Philippines —  Dili na unya makita ang taas nga linya sa mga empleyado sa City Hall sa Siyudad sa Mandaue sa City Treasurer's Office (CTO) alang sa pagkubra sa ilang suweldo.

Nunot usab sa tinguha ni Mayor Thadeo Jovito "Jonkie" Ouano nga ipaagi na sa ATM ang pagkubra sa ilang suweldo  sa tanan nga mga empleyado  sa Mandaue City Hall.

Giapil ni Ouano nga ipaagi na sa ATM ang ilang suweldo ang tanan nga mga job order sa City Hall ug mga contractual workers.

Nakahukom niini si Ouano dihang nakita niini ang kahasol sa matag kawani sa pagkubra sa ilang suweldo nga kinahanglan pa nga molinya nga posible pa nga makaepekto sa ilang trabaho.

 Si Atty Gonzalo "Sally" Malig-on, City Administrator sa maong siyudad miingon nga ang pagpaagi na sa ATM sa suweldo sa mga empleyado sa City Hall dili lang sa paghatag og kasayon sa mga empleyado sa City Hall sa pagkubra sa ilang suweldo.

Makatabang sab kini sa kagamhanan sa pagdaginot sa gamiton nga papel alang sa mga payroll sa mga kawani sa matag departamento niini.

Makaminus usab kini sa stress sa mga kawani ilabi na sa panahon sa pagproseso sa mga payroll sa matag petsa 15 o 30 nga pagsuweldo sa matag empleyado.

Nunot niini ang tanan nga mga kawani sa City Hall ang mopahigayon na sa pagproseso ngadto sa Land Bank  alang sa ilang pagkuha og ATM card nga ilang magamit sa pagkubra sa ilang suweldo sugod na sa bulan sa Oktobre niining tuiga. (BANAT NEWS)