Drug den gironda

CEBU, Philippines —  Upat ka mga tawo ang nasikop human gironda ang usa ka drug den sa Sitio Avocado, Barangay Mambaling ning Dakbayan sa Sugbo atol sa gipahigayon nga buy-bust operation sa mga operatiba sa PDEA Cebu Provincial Office uban ang Mambaling Police Station alas dos kwarenta sa hapon adlaw nga biernes.

Ang PDEA 7 Regional Director Joel Plaza, niila sa mga nadakpan ang subject ug tigmintenar sa drug den nga si alias Eric 45, usa ka plea  bargainer, trabahante niini sa drug den nga 34-anyos nga babaye ug lakip sa mga parokyano niini nga usa ka 49-anyos nga babayeng taga Mambaling ug 50-anyos nga taga Barangay Buhisan ning siyudad sa Sugbo.

Nasakmit gikan sa mga dinakpan ang upat ka putos sa gituohang shabu nga motimbang og 14.6grams nga adunay P99,000 kapin o kulang nga estimated average market value, buy-bust money ug kagamitan sa pagsuyop.

Ang mga ebidensya gisumiter sa PDEA7 Regional Office Laboratory samtang ang mga suspetsado kasamtangan nagtingkagol temporaryo usa anaa sa PDEA 7 Detention Facility sa Lahug.

Ang tigmintinar sa drug den nga si Eric nasikop na kaniadto tungod sa gihapon sa ginadili nga drugas apan nipaubos sa plea bargain niadtong 2019.

Samntang nadakpan sa akto sa kapolisan nga nagbaligya og shabu ang duha mga lalaki ug ang usa nga nagpalit niini sa miaging gabii sa Purok Singapore, Barangay Cambayog sa Lungsod sa Compostela.

Si Police Captain Lino Tryss Galvan III, Officer-In-Charge sa Compostela Police Station miila sa mga nadakpan nga naglakip sa usa ka babaye nga si Alexas Balingit Pacino alyas Ek-Ek, 48, Greg Tejero Wagas, 38, pulos taga Purok 2 sa Barangay Cambayog ug ang usa ka Vencie Bugsangit Porlas, 22. Matud pa ni Galvan nga ang team sa Municipal Drug Enforcement Unit (MDEU) ang nagpahigayon og buy bust operation batok ni alyas Ek-ek, human sila makadawat og impormasyon labot sa ilegal nga kalihokan sa maong mga dinakpan sa maong lugar.

 Dihang gihimo ang drug operation nataymingan ang 22 anyos nga ilang customer nga nagpalit usab og shabu nga misulay unta sa pagdagan apan nagunitan kini sa mga polis hinungdan nga lakip kini sa nasikop.

Nakuha sa kapolisan nga mga ebidensiya atol sa ilang pagkasikop ang pito ka paketeng shabu nga 35 gramo nga nagkantidad kini og P2,380 apil na usab ang buy bust money nga P500.

Samtang nadakpan sa mga operatiba sa Provincial Intelligence Unit/Provincial Drug Enforcement Unit sa Bohol Police Provincial Office(BPPO) ang usa ka high value individual atol sa ilang buy-bust operation aa Purok-6, Barangay San Isidro, Lungsod sa Calape, Probinsya sa Bohol kagahapon sa buntag, Sabado, Septembre 20, 2025.

Ang nadakpan mao si Paul Michael Josol alyas Borgy, 40, taga Sitio Masang, Barangay Sta. Cruz, Lungsod sa Calape sa maong Probinsya ug usa ka high value individual.

Nasakmitan ang suspetsado og 520 grams sa gituohang shabu nga nibalor og P3.5 million.

Gawas niini, nakuhaan sab ang suspetsado og usa ka kalibre .45 nga armas nga dunay tulo ka bala, cellular phone, buy-bust money, sling bag ug usa ka motorsiklo nga gigamit matod pa sa pag transport sa illegal nga drugas.  Sobra sa usa ka buwan nga gi-surveillance ang suspetsado human ang kapulisan nakadawat og impormasyon labot sa illegal nga kalihukan sa suspect.

Maka-dispose matod pa ang suspect og 100 grams nga shabu kada semana ug ang tinubdan matod pa niini kay naa sulod sa prisohan.

Kasong kalapasan sa Republic Act 9165 ug Republic Act 10591 ang ipasaka batok sa suspect. (BANAT NEWS)