Upat ka armado nadakpan

CEBU, Philippines —  Upat ka mga lalaking pulos nagtinil og armas nga walay lisensiya ang nangadakpan sa managlahing operasyon sa kapolisan sa Cebu City Police Office. Niadtong Biyernes sa gabii, September 19, 2025 nadakpan diha sa Sitio Laurente, Barangay Tejero sa mga sakop sa Police Station 3 ang usa ka 51 anyos nga lalake.

Ang suspect mao si Romeo Balbidas Patangan alyas Meo, 51 anyos, construction worker ug taga Sitio Laray, Barangay Carreta ning siyudad.  Nadakpan kini pinaagi sa Oplan Bulabog , nakit-an nila ang suspect nga nagbitbit og armas nga usa ka .22 Snub Nose Caliber Revolver nga wala'y serial number ug dunay usa ka bala.  Samtang sa A. Soriano Street, Barangay Carreta, Cebu City nadakpan sab sa kapulisan sa Mabolo Police Station 4 ang 29 anyos nga si Jan Sol Ragasajo, 29, taga Sitio Cabangcalan II, Barangay Bulacao ning siyudad.

Nadakpan siya sa checkpoint sa Mabolo Police Station 4 sa maong dapit dihang niagi ang suspek ug nakuhaan og armas.

Samtang nadakpan sab sa kapulisan sa Talamban Police Station 8

niadtong Huwebes sa gabii, September 18, ang usa ka 22 anyos nga lalake diha sa Greenwoods Subdivision, Barangay Pulangbato, Siyudad sa Sugbo.

Ang gidakop mao si Christian Rubio, 22, nagpuyo sa Basabas Compound Street, Barangay Tipolo, Mandaue City. Nasakpan kini atol sa regular checkpoint human usa ka motorsiklo nga duha ka buok ang sakay ang gipahunong alang sa inspection.

Ang backrider giingong wala mahimutang ug nakitaan nga dunay nagbugdo sa hawakan niini.  Dihang gipaisa ang t-shirt misuway kini og dagan aron moikyas ug gilabay ang usa ka butang nga nasuta armas diay.

Dali kining gigukod sa otoridad og nadakpan.  Na-recover ang usa ka .38 revolver nga dunay duha ka buhing bala.

Samtang Biyernes sa kadlawon, nadakpan sab sa kapulisan sa Labangon Police Station diha sa Balaga Drive, Barangay Labangon ang 31 anyos nga si Jade Ogapay Premacio, construction worker ug taga Sitio Bugnay 2, Barangay Labangon, Cebu City.

Nadakpan sab kini sa checkpoint human nabantayang nagbitbit kini og pugakhang. Sa pagsusi sa maong armas , kargado kini og usa ka bala. Wala makapakita ang suspetsado og papeles sa armas nga gihuptan hinungdan nga kini gidakop.  Ang mga dinakpan pasakaan og kasong kalapasan sa Republic Act 10591.