Paspas ra ang biyahe pinaagi sa CBRT

CEBU, Philippines — Bisan pa sa mga reklamo ug bagulbol sa publiko, nakakita  gihapon si Cebu City Mayor Nestor Archival nga adunay alibyo sa dagan sa trapiko sa mga nagsakay sa CiBus nga mogamit sa dedicated lanes sa Cebu Bus Rapid Transit system.

Kini tungod kay mas paspas makaabot sa destinasyon ang mga mosakay sa CiBus. Makuha lang og unom ka minutos ang biyahe gikan sa Fuente Osmeña paingon sa Cebu South Bus Terminal.

Naobserbahan kini sa pagpahigayon sa tulo ka adlaw nga route inspection ug test run sa Package 1 sa Cebu Bus Rapid Transit.

Ang test run gihimo aron pagsuta kung unsa ang angayan nga bag-uhon o han-ayon aron nga masiguro nga andam na ang sistema sa transportasyon nga mohatag og serbisyo ngadto sa kinabag-an.

Gihulagway ni Archival nga hapsay ug komportable ang pagsakay sa mga bus nga moagi sa dedicated lanes kun diin kung wala pa mihunong sa mga stoplight, posible nga makunhuran ngadto sa upat ka minutos ang biyahe.

Apan luyo aning maayong obserbasyon ni Archival sa dagan sa biyahe sa CiBus, giangkon niya nga duna gyuy wala malipay tungod kay bugtong ang maong mga bus lang ang gitugotang makadagan sa maong CBRT lane.

Ang uban, sa gawas lamang niini o sa kilid hinungdan sa grabeng paghuot sa trapiko ilabi na diha sa Natalio Bacalso Avenue.

Tungod ani, nihangyo si Archival og dugang pailob sa mga tag-iya og mga pribadong mga sakyanan ug mga motorista.

Sa gipahigayon ang mga test run inubanan ni Bise Mayor Tomas Osmeña ug sa mga representnate gikan sa Department of Transportation, Land Transportation Office-7, Land Transportation Franchising and Regulatory Board-7 ug Cebu City Transportation Office, si Archival nagkanayon nga daghan pa og angayang palamboon sa CBRT.

Sama sa mga traffic signs, mga stoplights ug pagdugang og mga tawo nga magmando sa dagan sa trapiko.  Gipahibalo sab ni Archival nga magdugang pa og mga og test runs, sa sunod ang Phase 1 o ang rota gikan sa SM Seaside paingon na Ayala Center Cebu nga mahitabo sunod semana sa dili pa ipahigayon ang dry run karong Septiyembre 29, 2025.

Gipatun-an sab ni Archival kung pila ka minutos ang dagan sa mga ordinaryong sakyanan nga moagi gawas sa CBRT lanes ug itandi kung mosakay sa bus nga moagi sa CBRT.

Gilauman nga ang CBRT makatabang sa pagpakunhod sa kahuot sa dagan sa trapiko ug mopaspas na ang biyahe.   Para ni Archival, kompleto na ang Phase 1 sa CBRT, kinahanglan nalang hashasan.

Dili mominos sa 20 ka bus ang mobiyahe sa CBRT gikan sa buntag hangtud na sa alas onse sa gabii.

Ang minimum nga pletehan tag P15 ug pun-an og 2.65 sa mosunod nga kilometro, diin adunay capacity nga makapasakay og 40 ngadto sa 80 ka pasahero ang matag bus.   IBM BANAT NEWS