Polis nangulata sa asawa balhog sa prisohan

CEBU, Philippines — Dili duphan sa Cebu Police Provincial Office (CPPO) ang polis nga gikatahong nangulata sa asawa sa Lungsod sa Samboan niadtong Martes.

Gikataho nga ang maong polis nga nagranggo og Police Senior Master Sergeant, 47-anyos, nadestino sa Samboan Municipal Police Station gireklamo sa iyahang asawa nga 44-anyos gumikan kay wala na kini kaagwanta sa pagpangulata sa suspetsado.

Base sa taho sa Samboan Municipal Police Station nahitabo ang pagpangulata niadtong Martes sa kadlawon diha sa Barangay Poblacion, Lungsod sa Samboan.

Ang biktima nanawag sa police station ug nagpakitabang tungod kay gikulata kini sa iyahang bana.

Ang biktima nipasangil nga gisukmag sa suspetsado ang wala nga bahin sa iyang nawong ug gibitad ang iyahang buhok ug giguroy siya gawas sa ilang panimalay.

Giingong gibagnos usab sa suspetsado ang nawong sa biktima ngadto sa sementado nga paril.

Niresponde dayon ang kapolisan ug boluntaryo nga nitahan sa kaugalingon ang suspetsado.

Gikataho nga ang suspetsado nagselos kini gumikan kay natahap nga adunay laing lalaki ang biktima.

 Si Police Lieutenant Michael John Bañes, tigpamaba sa Cebu Police Provincial Office nagkanayon nga ang biktima andam mopasaka og kasong kalapasan sa Akta Republika 9262 kun “Anti-Violence Against Women and their Children Act of 2004 “batok sa suspetsado.

Gibutyag ni Bañes nga gawas sa criminal charges nga ipasaka batok sa suspetsado mag-atubang usab kini og kasong administratiba.

"As protectors of peace and order police officers must be the first to embody discipline, respect the rule of law. Any violations of these principles more so by those in uniform will not be tolerated. Rest assured CPPO remains committed to our mandate fo safeguarding every individual and ensuring that offenders regardless of rank or position are held accountable for being actions", dugang ni Bañes. (BANAT NEWS)