Duha gi-salvage

CEBU, Philippines — Duha ka mga patay’ng lawas ang napalgan sa managlahing lugar sa Cebu City ug sa Talisay City, ang mga biktima gituohang pulos biktima sa summary execution.

Sa Sitio Antuanga, Barangay Quiot, siyudad sa Sugbo napalgan ang usa ka patay’ng lawas niadtong Domingo sa hapon, Septiyembre 14, 2025.

Ang biktima nga yagpison og lawas adunay patik sa wala nga bahin sa dughan nga 'Rembar Tabora' ug laing tattoo sa tuo nga paa niini nga porma og diamond.

Usa ka hiker nga fire volunteer sa Kinasang-an Pardo ang nakakita sa patay'ng lawas ug maoy daling ni-report sa otoridad.

Sigon ni Police Captain Charisma Gonzales, tigpamaba sa Cebu City Police Office ang biktima daghan og bun-og, dunay samad nga agi sa pinusilan ang lawas niini. Aduna say na-recover sa area nga mga basiyo sa bala.

Posible matud pa ang biktima sa laing dapit gipatay ug gilabay lang kini sa lugar kun asa kini nakit-an kay way nakadungog og butobuto sa armas gikan sa lugar.

Wala gisalikway sa CCPO ang posibilidad nga ang biktima konektado sa patay'ng lawas nga nakit-an sa dakbayan sa Talisay hinungdan nga makig-alayon sila sa Talisay City Police Station.

Ang patay’ng lawas nga nakaplagan sa daplin sa karsada sa Purok Bamboo, Barangay Manipis, bukiran nga bahin sa Dakbayan sa Talisay adunay mga samad pinusilan sa iyang ulo.

Gigapos og masking tape ang iyang mga kamot ug gibudboran usab og panapton ang ulo niini. Gipaskinan ang tiilan niini nga adunay nakasulat nga “huwag tularan, drug addict ako.”

Usa ka barangay tanod ang unang nakadawat og tawag may kalabutan sa patay’ng lawas nga nakit-an sa lugar human nga ang mga residente sa dapit nakadungog og buto-buto sa armas de fuego ug naagian usab kini og habal-habal driver nga nag buy-od sa maong dapit.

Ang mga tanod dali nga nisusi sa maong dapit ug didto nakita ang biktima nga adunay mga samad pinusilan ug nagpasad ang mga basiyo sa bala hinungdan dali sila nangayo og tabang sa kapulisan.

Ang mga residente sa dapit wala makaila sa biktima uy dako ang ilang pagtuo nga dili kini molupyo sa maong dapit. Ang biktima gibanabanang 30 anyos ang pangidaron.

Apan ang kapulisan sa Dakbayan sa Talisay pinangulohan sa ilang hepe nga si Police Lt. Col. Maila Causin Maramag, nibutyag nga nailhan na ang biktima ug kini residente sa barangay Inayawan ning Dakbayan sa Sugbo.

Padayon pa ang ilang imbestigasyon inabagan sa pamilya. Dugang pa ni Maramag, aduna silay tulo ka team nga gimugna aron motutok sa imbestigasyon uban sa kadagkuan usab sa CPPO.

Matud pa ni Maramag, ang biktima gituohan diha ra kini gipatay sa maong dapit human nakuha ang 10 ngadto sa 15 ka basiyo sa bala  sa .9mm ug .45 pistol, apan daghan niini nikagar.

Ang biktima nakaangkon og mga samad sa nagkadaiyang parte sa kalawasan ug ulo, diin wala gisalindot nila ang posibilidad nga basin may kalabutan sa illegal nga drugas ug uban pa.

Nagpadayon usab ang kapulisan sa pagpahigayon og backtracking sa mga CCTV nga posibleng naagian sa biktima ug sa  mga mamumuno samtang gidala kini sa maong lugar. IBM BANAT NEWS