Niambak sa falls, patay ng napalgan
CEBU, Philippines — Patay na nga nakit-an ang 16-anyos nga batan-ong lalake nga na-missing og duha ka adlaw human milayat sa Bugasok Falls sa Barangay Conalum, Lungsod sa Argao. Napalgan kini kagahapon sa alas 11 sa buntag, Lunes, Septiyembre 15, 2025.
Una niini, ang biktima nga Grade 11 student nga taga Barangay Tulic sa maong Lungsod na-missing niadtong Sabado, Septiyembre 13, 2025.
Ang Argao Municipal Police Station nakadawat of tawag labot sa insidente sa lumos sa maong dapit ug dali nila kining girespondehan.
Pag-abot nila sa naasoy nga dapit ang mga residente ug Barangay Officials sa maong Barangay uban ang Argao Municipal Disaster Risk Reduction and Management Office(MDRRMO) naa na sa area.
Apan wala dayon sila nakahimo og search and rescue tungod sa kusog nga bul-og sa tubig ug ngitngit na ang dapit.
Sa imbestigasyon sa kapulisan ang biktima kuyog ang higala niini niadto sa Bugasok Falls aron mangaligo.
Una niini, wala makigdungan ang biktima og kaligo ug naa ra sa daplin nagtan-aw sa mga higala ka dili kini kahibawo molangoy.
Apan sa dihang nikawas na gikan sa tubig ang iyang mga kauban, gikatahong kalit nga nilayat gikan sa falls ang biktima.
Wala na kini molutaw og balik hinungdan nga ni-dive ang mga amigo niini aron siya pangitaon apan wala na nila kini makita maong nangayo sila og tabang sa barangay.
Kagahapon sa buntag nakit-an ang lawas apan wala na kini kinabuhi. IBM BANAT NEWS
- Latest















