Komisyon nga moimbestigar sa flood control projects giporma

CEBU, Philippines — Gipahibalo na sa Malacañang kagahapon, Sabado, Septiyembre 13, ang molangkub sa Independent Commission for Infrastructure (ICI) nga gitahasang mosusi sa mga anomalya sa flood control projects sa gobiyerno.

Sa press conference, giingon ni Palace Press Office Undersecretary Atty. Claire Castro nga lakip sa komisyon si Rogelio “Babes” Singson, kanhi kalihim sa Department of Public Works and Highways (DPWH), ug si Rossana A. Fajardo, country managing partner sa auditing firm nga SyCip Gorres Velayo & Company (SGV & Co.)

Gipahibalo usab nga si Baguio City Mayor Benjamin Magalong gitudlo isip espesyal nga adviser ug investigator sa ICI. Si Magalong haom sa maong posisyon isip kanhi direktor sa Criminal Investigation and Detection Group.

Wala pa gibutyag ang ngalan sa chairperson sa komisyon, apan sumala ni Castro, ipahibalo kini ni Presidente Ferdinand Marcos Jr. sa mosunod nga mga adlaw.

Ang ICI gimugna pinaagi sa Executive Order No. 94 nga nagtugot niini sa pagsusi ug pagutingkay og mga ebidensya, intelligence reports, ug dokumento nga may kalabotan sa mga opisyales sa gobyerno, empleyado, ug uban pang tawo nga posibleng nalambigit sa anomalya, iregularidad, ug pag-abuso sa pundo alang sa flood control ug uban pang proyekto sa inprastruktura.

Prayoridad nga tutokan karon sa ICI ang mga flood control ug uban pang infrastructure projects nga gihimo sulod sa nakalabay nga napulo ka tuig .

Sumala pa sa EO, adunay gahum ang komisyon nga mangayo og subpoena ug makolekta sa mga kopya sa mga kontrata, bank records, ug uban pang administratibo ug pinansyal nga dokumento nga gikinahanglan sa imbestigasyon.

Matud pa sa Malacañang, ang pagpili sa mga miyembro gibase sa ilang kasinatian ug integridad.

Si Singson adunay halapad nga kasinatian sa pagpanguna sa dagkong proyekto sa imprastraktura isip kanhi kalihim sa Department of Public Works and Highways.

Samtang si Fajardo adunay kapin tulo ka dekada nga kasinatian sa auditing ug financial risk management.

Si Magalong nailhan sa iyang abilidad sa pagsusi sa sensitibo nga mga kaso gamit ang forensic-based nga pamaagi isip usa ka banggiitang imbestigador sa CIDG kaniadto sa wala pa siya nisulod sa politika. (BANAT NEWS)