Gitripan og kulata, gidunggab

CEBU, Philippines — Naangol ang usa ka 17-anyos nga lalake human gitabangan og kulata sa grupo sa mga batan-on ug gidunggab pa gyud diha sa Pio del Pilar, Barangay Poblacion, dakbayan sa Danao kagahapon sa kadlawon, Biyernes, Septiyembre 12, 2025.

Ang biktima mao si alyas Jan, taga Purok Bulahan, Barangay Taboc, Danao City.  Samtang ang mga nangulata mao sila si alyas James, 18 anyos, taga Purok 2, Barangay Tuburan Sur; alyas John, 15 anyos, taga Sto. Niño, Barangay Taytay, Danao ug sila si alyas Alpechie ug Arthur pulos taga Barangay Looc sa maong siyudad.

Diha sa tambalanan gi-interview sa kapulisan ang biktima miingon nga nitambong sila sa iyang mga kauban sa kalingawan sa siyudad apan kalit silang gigukod  og mga batan-on siya maoy naabtan ug gitabangan og kulata ug dunay nidunggab sa iyang likod.

Basi sa inisyal nga imbestigasyon sa kapulisan, walay igong hinungdan nganong gigukod ug gikulata sa maong mga batan-on ang biktima.

Sa follow up operation ang kapulisan nadakpan ang 18 anyos nga lalake ug na-rescue ang usa ka 15 anyos.

Sa laing bahin, usa ka lalaki ang gidakop human niya gikulata ang iyang maguwang diha sa balay mismo sa biktima sa Purok Miracle Fruit,  Barangay Yati, Lungsod sa Liloan  kagahapon sa kadlawon, Septiyembre 12, 2025.

Si Police Executive Master Sergeant Eutiquio Porsia, sa Liloan Police Station miila sa suspetsado nga mao si  Emilito Encarnacion Hortezano, 59,  samtang ang biktima mao si Reynaldo, 60.

Matud ni Porsia, hubog ang suspek ug gisikaran ang pultahan sa balay sa biktima. Ang biktima diha sa luyo sa pultahan adtong tungora nalamba ug diretsong gimakmak og sumbag sa suspek.

Nangayo og tabang ang biktima sa mga silingan ug sa pagabot sa mga tawo ayha pa nibiya ang suspek.

Si Porsia miingon nga natripan sa suspek ang maguwang tungod sa iyang kahubog.  IBM BANAT NEWS