Kapitolyo mopatuman og amnesty sa RPT

CEBU, Philippines — Ipatuman sa Kapitolyo karon ang Real Property Tax amnesty aron paghatag og mas affordable nga serbisyo ngadto sa mga Sugboanon.  Matud sa Cebu Provincial Information Office nga subay kini sa Akta Republika 12001 kun “Real Property Valuation and Assessment Reform Act” ug memorandum No. 001-2025  sa Bureau of Local Government Finance (BLGF) nga nahimong balaod niadtong Hunyo 2024.  Ang maong balaod nahimong epektibo sa buwan sa Hulyo sa niaging tuig nga nagmando sa pag-grant og tax amnesty sa mga delinquent real property taxes ug special levies lakip na ang Special Education Fund, Idle Land Tax ug ubang special assessment.

Ubos sa internal rules and regulation sa maong balaod ang amnesty nag-cover sa mga silot, surcharges ug interest sa tanang wala mabayari nga real property tax o buhis sa wala pa ang Hulyo 5, 2024.

Pasbaot niini nga ang taxpayers gi-require lang usa nga bayaran ang basic tax amount niini.

Ang maong programa mamahimo ra nga ma-avail sugod sa Hulyo 5, 2024 hangtud Hulyo 5, 2026.  Sulod sa maong panahon, ang delinquent property owners mamahimong makabayad og tibuok nga buhis o iagi og installments subay sa guidelines nga gilatid sa Probinsiya sa Sugbo.

Ang amnestiya usa sa legal nga pamaagi alang sa taxpayers nga pakyas pagbayad sa ilang buhis kaniadto.

Pinaagi sa maong inisyatibo, mahatagan og higayon ang mga magbubuhis nga limpiyohon ang ilang record nga dili makabayad sa ilang multa, interest o mag-atubang og kaso.

Ang mga magbubuhis nga Sugboanon mamahimong makaadto sa Provincial Treasurers Office alang niini.

Dugang sa Kapitolyon nga pamaagi kini sa administrasyon karon aron dili mabug-atan ang mga Sugboanon sa pagbayad sa ilang RPT.  BDB BANAT NEWS