Drone pilots sa PRO-7 nagkompetisyon

CEBU, Philippines — Ang Police Regional Office (PRO)-7 pinaagi sa Regional Information Communication Technology Management Division (RICTMD) nilusad sa ilahang labing unang Drone Piloting Skills Challenge kagahapon sa buntag, Huwebes sa Camp Sergio Osmeña Sr., Dakbayan sa Sugbo.

Ang maong pinakaunang inisyatiba pagpakita kini sa PRO-7 sa pagtuman sa gustong kalamboan sa pagpamolis ubos sa pamunoan sa acting PNP Chief tungod sa bag-ong mga hagit sa modernong panahon.

Niapil sa maong kompetisyon ang 12 ka teams gikan sa Lapu-lapu City Police Office (LCPO), Bohol Police Provincial Office (BPPO), Regional Mobile Force Battalion (RMFB), Mandaue City Police Office (MCPO), Cebu Police Provincial Office (CPPO), ug Cebu City Police Office (CCPO).

Matag team gilangkuban sa pilot, co-pilot, spotter, ug narrator.  Ang mga nisalmot gi-evaluate may labot sa Safety Protocols, Piloting and Flight Skills, Precision, Accuracy, Speed, Efficiency, ug Mission Accomplishment diin 100 points ang total niini.

Ang mga pilots mimaniobra sa ilang drones sa lain-laing obstacle course aron masukod ilang control, precision, ug aerial photography skills.  Ang mga hukom sa maong kalihukan mao ang mga drone experts sa Armed Forces of the Philippines nga mao silang Captain Alfred G Tan, PAF Reserve, Squadron Commander, Drone and Communications Rescue Unit, 124th Philippine Air Force ARU Eaglecom ug Petty Officer 3 Ian Ramirez, PN Reserve Force, usa ka CAAP-certified Unmanned Aerial Vehicle Pilot.

Human sa maong kulbahinam nga kompetisyon, ang Cebu City Police Office Team 2 nakakuha sa first place pinaagi sa 78.84 points, gisundan kini sa CPPO Team 2 sa score nga 78.47 points ug CPPO Team 1 nga nakakuha og 77.44 points.

Ang mga winners nakadawat og tropeyo, certificates of achievement ug cash prize samtang ang tanang gihatagan sab certificates of recognition ug cash incentives.

Sa mensahe ni PRO-7 Regional Director Police Brigadier General Redrico Maranan gihimug-atan niini ang importansiya sa innovation sa law enforcement.

"In today’s evolving law enforcement landscape, advanced technologies like drones are vital to modern policing. They provide strategic operational advantages, enhance response times, and minimize risks to our personnel. Strengthening our officers’ drone piloting skills underscores our commitment to remain Makabagong Pulis—innovative, capable, and focused on our mission," sigon ni Maranan.

Gi-anunsiyo sa mga organizers nga ang Drone Piloting Skills Challenge mahimong annual event aron mapalambo ang operational readiness sa surveillance, search-and-rescue operations, disaster response, crime scene monitoring, ug crowd control.

Sa kasamtangan ang PRO-7 dunay 140 ka drones nga available alang sa deployment sa police operations.  IBM BANAT NEWS