Biyahe sa eroplano sa Isla sa Bantayan ibalik

CEBU, Philippines — Gikatakdang ibalik na ang operasyon sa biyahe sa eroplano gikan sa mainland Cebu padulong sa isla sa Bantayan.

Kini ang gipahibalo sa operator nga King Aces And Travel and Tours sa ilang Facebook page, ug ingon man ni Sta. Fe Mayor Ithamar Espinosa.

Matud sa operator nga sugod sa Septiyembre 10, 2025 mamahimo na nga makapa reserba sa flight mga alas 9:00 sa buntag.

 Apan kon pila na ang plete sa eroplano ug kanos-a kini buksan, ang King Aces nagkanayon nga ila ra kining ipahibalo sa sunod.

Ang biyahe padulong sa Bantayan Island gilusad kini niadtong niaging tuig diin sulod sa 45 minutos ra ang biyahe gikan sa Mactan-Cebu International Airport padulong sa airport sa Santa Fe sa Isla sa Bantayan pinaagi sa 72-seater ATR twin-engine turbopop aircraft.

Ang plete kaniadto anaa sa P888 sa usa ka biyahe.

Si kanhi gobernador Gwendolyn Garcia naglaom nga adunay mga bag-ong world class facility nga mobarog sa Bantayan Island.

Matud ni Garcia nga ang Bantayan Island dili malikayan nga usa na kini karon ka prime destination nga balik-balikan sa mga turista.

Ug mas maayo nga adunay dugang mga facility aron mas mokabig pa kini ug daghang mga turista.

Gawas sa mga mobarog nga mga four o five star hotel mas maayo usab mapadayon ang mga flight alang sa mga biyahedor.

Gipadayag usab ni Garcia nga angayan usab palig-onon ang mga pantalan ug  kinahanglan ang usa ka holistic approach alang sa dugang pa nga mga kalamboan. BDB BANAT NEWS