Service sa BJMP nalimbuwad, 16 angol

CEBU, Philippines — Naangol ang 12 ka mga Persons Deprived of Liberty (PDLs) ingon man ang upat ka mga jail officers human nalimbuwad ang transport vehicle sa BJMP sa national highway, Barangay Langtad, Lungsod sa Argao pasado alas-7 sa buntag kagahapon, Lunes, September 8, 2025.

Ang mga naangol nga mga Jail Officers nagranggo og Jail Officer 1, Senior Jail Officer 1 ug Jail Officer 2. Gilangkuban kini og driver sa transport van, escort team leader ug duha ka escorts.

Nasayran nga ang BJMP transport vehicle karga ang 12 ka mga PDLS gikan sa Argao Municipal Jail ug paingon unta sa Municipal Trial Court alang sa hearing. Base sa imbestigasyon sa Argao Municipal Police Station nga samtang nagbiyahe sa kurbadahon nga dapit sa highway ang driver mitunob sa brake apan gumikan sa kadangog sa dalan tungod sa uwan nawagtangan kini og kontrol hangtud nga sila nalimbuwad. Tungod sa hitabo ang mga sakay sa transport vehicle nangalabay ug nangaangol. Ang mga naangol gidala sa mga personnel sa MDRRMO sa Lungsod sa Argao sa Kintanar Memorial Hospital alang sa medical treatment. (BANAT NEWS)