HVI nadakpan, P1.1 milyong shabu nasakmit

CEBU, Philippines — Nadakpan sa mga operatiba sa Mabolo Police Station 4 Cebu City Police Office ang usa ka high value individual atol sa ilang buy-bust operation sa Sitio Marna, Barangay Mabolo, Siyudad sa Sugbo kagahapon sa kadlawon, Domingo, September 7, 2025.

Giila ang nadakpan nga si Gerald Daan Dañeles alyas Casper, 30, nagpuyo sa Sitio Mahayahay 1, Barangay Pasil, siyudad sa Sugbo. Nasakmitan ang suspetsado og 170 grams sa gituohang shabu nga nibalor og P1.1 million.

Sa impormasyon sa kapulisan ang suspetsado nadakpan niadtong 2022 sa kasong kalapasan sa Section 11 ug napriso sa Cebu City Jail dayon pagka 2023 nadakpan sab kini sa dakbayan sa Lapu-Lapu tungod gihapon sa kalapasan sa Section 5 ug 11, Article II sa Republic Act 9165 ug nakuhaan kini og 50 gramos apan na-acquit.

Gikatakda nga pasakaan og tukmang kaso ang suspetsado. — /IBM (BANAT NEWS)