Gihimong backfilling diha sa Tejero walay permit

CEBU, Philippines — Gitumbok sa Cebu City Environment and Natural Resources Office (CCENRO) ang taho kabahin sa ilegal nga backfilling nga gihimo sa usa ka contractor diha sa Barangay Tejero nga walay mga permit.

Base kini sa report nga gisumite sa CCENRO ngadto sa konseho sa siyudad nga gikatakdang hisgotan sa umaabot nga regular nga sesyon karong Martes.

Ang CCENRO nakadawat og endorsement gikan sa Office of the Building Official (OBO) niadtong Hulyo 14, 2025 kabahin sa ilegal nga backfilling activities diha sa M.J. Cuenco Ave., Barangay Tejero, Cebu City.

Ang CCENRO nisugyot og site inspection ug imbestigasyon isip tubag sa endorsement OBO.

Atol sa ilang inspection, gibutyag sa CCENRO nga wala sila pasudla sa lugar tungod kay gibabagan sila sa mga security personnel apan nakasaksi gihapon sila og operating backhoe sulod sa site.

Nakita usab nila nga adunay stockpile sa kinalot nga yuta ug presko pa nga lapok nga nahibilin sa mga ligid sa mga truck nga nisulod ug gawas sa lugar.

Sa ilang pakighinabi sa security personnel sa site gikataho nga adunay dumping sa excavated soil sa maong lugar.

Human niini, nidiretso ang CCENRO sa buhatan sa contractor nga J. Velez Development Corporation (JVDC) aron klarohon ang detalye sa backfilling.

Matud sa project manager adunay dumping sa nakalot nga yuta gikan sa road works sa Ayala Center Cebu.

Gibutyag sa project manager nga temporaryo ra nga gigamit ang stockyard sa ilang site ug mobalik ra ang hauler aron kuhaon ang gi-dump nga yuta.

Ang hauler giingon nga mao sab ang contractor nga kasamtangang nagtrabaho sa road works sa Ayala Center Cebu.

Ang CCENRO nisunod sa actual nga road works site sa Bohol Ave., Ayala Center Cebu ug nangutana sa foreman kabahin sa maong backfilling.

Gibutyag sa foreman nga adunay dumping sa nakalot nga yuta gikan sa road works nga gihimo sa laing contractor nga mao ang CK Builders.

Gi-insist sa foreman nga gigamit ra ang lugar sa JVDC isip temporaryo nga stockyard ug kuhaon ra gihapon ang yuta.

Gikataho nga walay napakita nga hauling permit ang contractor ilabi na ang Special Hauling Permit nga gihatag sa Cebu City Mining Regulatory Board (CCMRB).

Sa ilang findings, gipadayag sa CCENRO nga ang pag-transport ug pag-dispose sa yuta nga gihimo sa CK Builders ngadto sa site sa JVDC sa Barangay Tejero ilegal tungod kay nakalapas kini sa City Ordinance No. 2115 kun “Cebu City Mining Ordinance.” — /BDB (BANAT NEWS)