Rumble Strips sa dalan papun-an
CEBU, Philippines — Gipaningkamutan sa Cebu City Council nga magbutang og dugang rumble strips sa mga dagkong karsada, ilabi na sa padulong sa mga pedestrian lanes aron makunhuran ang aksidente sa dalan.
Ang maong ordinansa giproponer ni Konsehal Jose Lorenzo Abellanosa nga nagtuo nga pinaagi sa rumble strips mapugos ang mga drayber sa pagpahinay ug pag-amping sa dihang moabot sa pedestrian crossings.
Matud ni Abellanosa, ang rumble strips usa ka napamatud-ang safety features kay ang vibration ug tingog sulod sa ilang sakyanan makapukaw sa atensyon sa mga drayber.
Pinaagi ani, makabantay na silang daan ug makaandam nga sa unahan adunay pedestrian lanes.
Base sa datos sa Cebu City Transportation Office (CCTO), ang syudad nakarehistro og average nga 24 ka aksidente matag adlaw.
Gikan Enero hangtod Marso 2023, 2,132 ka aksidente ug traffic violations ang natala, mas taas og 148 porsiyento itandi sa 859 ka kaso sa susamang panahon sa 2022.
Giklaro diha sa resolusyon nga dili garantiya ang pedestrian lanes nga mopahinay og padagan ang mga drayber, kay daghan gihapon ang mopakusog og dagan bisan duol na sa crossings. (BANAT NEWS)
- Latest
