Dry run sa CBRT project ipadayon

CEBU, Philippines — Bisan pa sa kausaban sa pangulo sa Department of Transportation (DOTr) ipadayon gihapon ang dry run sa Cebu Bus Rapid Transit (CBRT) project karong Septiyembre 15, 2025.

Kini ang gikompirma ni Cebu City Mayor Nestor Archival, Sr. niadtong Huwebes. Matud ni Archvial nga gusto niya nga matuman ang dry run sa wala pa ang pormal nga pagsugod sa package 1 karong Septiyembre 25, 2025.

Gikataho nga ang rota sa dry run magsugod gikan sa SM Seaside padulong sa Ayala.

Gihisgotan usab niya ang iyang kabalaka sa presensiya sa street dwellers nga nag-ukopar sa CBRT route.

Apan iyang giila nga limitado pa ang kapasidad sa siyudad sa pagkakaron tungod kay wala pa kini opisyal nga na-turn over sa lokal nga kagamhanan ug nihangyo si Archival ngadto sa DOTr aron aksyonan kini.

Sayo pa, si Archival niawaha sa PROBE (Prevention, Restoration, Order, Beautification, and Enhancement) team nga aksiyonan dayon ang isyu sa mga street dweller nga nagpuyo sa daplin sa CBRT stretch.

Kini tungod kay nakaobserba usab ang mayor nga kalit nidaghan ang mga street dwellers sa siyudad diin iyang gihuna-huna nga gumikan kini nga nagkaduol na ang pasko.

Bisan pa wala pa’y opisyal nga nag-operate ang CBRT gikataho nga adunay street dwellers ug vendors nga nag-ukopar sa linya.

Sa laing bahin,  gihangop ni  Mandaue City Mayor Thadeo Jovito “Jonkie” Ouano ang mga pagdayeg nga gihimo ni DOTr Undersecretary for Road Transport and Non-Infrastructure Ramon Reyes ngadto  sa  Siyudad sa Mandaue sa hapsay nga pagpatuman sa Public Transportation Modernization Program niini.

Gihimo ni Reyes ang maong pagdayeg ang hapsay nga pagpatuman sa PTMP atol usab sa ilang pagbisita sa buhatan ni Ouano niadtong Miyerkules.

Si  DOTr Senior Planning Officer Nel Ria Licopit  nagkanayon nga usa sa hinungdan nga nahimong kabahin ang Mandaue sa kalihokan mao ang hugot nga suporta sa siyudad sa pagpatuman sa PTMP nga ang tumong mao ang paghatag sa publiko og mas luwas, mas komportable ug mas passenger-friendly nga pampublikong transportasyon. BDB BANAT NEWS