Taskforce nga mobantay sa mga resort umolon sa Talisay

CEBU, Philippines — Mag umol ang kagamhanan sa Dakbayan sa Talisay og task force nga maoy motutok sa kalihukan sa mga resort.

Kini aron malikayan ang panghitabo nga magsagol ang mga kemikal nga ibubo sa swimming pool nga moresulta na hinuon sa peligro sa katawhan.

Si Talisay City mayor Gerald Anthony “Samsam” Gullas nibutyag nga iya nang gimandoan ang taga Bureau of Fire Protection (BFP), Business Permit and Licensing Office (BPLO), City Health Office (CHO), City Disaster Risk Reduction and Management Office (CDRRMO) ug uban pa nga maoy molangkob sa task force.  Matud pa ni Alvin Santillana, pangu sa CDRRMO nga adunay proseso sa paglimpyo sa swimming pool busa di kini angay kumpyansaan.

Sama nalang sa nahitabo sa swimming pool sa Alcoseba Resort and Hotel sa Barangay Pooc, Dakbayan sa Talisay diin nasagol ang chlorine ug ang muriatic.

Naalarma ang mga customer sa resort ug niabot sa 19 ka tawo ang nalipong ug nagsuka nga nadala sa tambalanan.

Ang naglimpyo sa swimming pool ang padayon pa sab nga nagpaalim sa second degree burn nga iyang naangkon atol sa chemical reaction.

Si Police Lt. Col. Maila Maramag, hepe sa kapolisan sa Talisay niingon nga pinaagi sa task force mahan-ay ang regulasyon sa resort aron di na masubli pa ang maong panghitabo.

Siya nagkanayon nga kadtong mga sakto sa training ang kuhaon sa management sa resort ug adunay saktong butangan sa ilang kagamitan ug mga kemikal nga gamiton sa paglimpyo sa swimming pool. MEL BANAT NEWS