“No Left Turn” policy ipatuman diha sa CSCR

CEBU, Philippines — Ipatuman sugod karong adlawa sa Cebu City Transportation Office (CCTO) ang “No Left Turn” policy diha sa duha ka key junctions sa Cebu South Coastal Road (CSCR).

Kini gitumong aron maminusan ang kahuot sa dagan sa trapiko sa maong lugar ug sa mga kasikbit nga dapit ilabi na panahon sa peak hour gikan sa adlaw nga Lunes hangtud sa Biyernes.

Ubos sa bag-ong sistema idili ang pag left turn diha sa CSCR intersections sa El Pardo Road ug F. Vestil Street panahon sa morning rush gikan sa alas 6:00 sa buntag hangtud sa alas 9:00 sa buntag ingon man sa alas 4:00 sa hapon hangtud sa alas 8:00 sa gabii.

Ang mga motorista nga moagi sa maong mga junctions ang i-reroute ngadto sa ipahiluna nga U-turn slots nga nahimutang sa SRP Viaduct Bridge ug duol sa Cebu City–Talisay City Border bridge.

Ipakatap usab ang mga traffic enforcers aron maoy mogiya sa mga drivers ug masiguro nga hingpit nga mapatuman ang rerouting plan.

Gihangyo sa CCTO ang mga motorista nga planohon ang ilang mga byahe ug motan-aw sa mga giposte nga sign ug labaw sa tanan magbaton og pasensya samtang mag-adjust pa ang siyudad sa bag-ong traffic pattern.

Nasayran ang pagbukas og bag-ong intersections ilabi na diha sa El Pardo Street ug Il Corso naghatag usab og traffic lights ug turning lanes nga nakabalda sa dagan sa mga sakyanan ug nakamugna og choke points panahon sa peak hours. The Freeman