Gi-salvage wala pa mailhi
CEBU, Philippines — Wala pa nailhan sa kapulisan sa Lungsod sa Aloguinsan ang lalake nga gigapos ang kamot ug patay'ng napalgan sa Barangay road sa Barangay Esperanza, Lungsod sa Aloguinsan niadtong Lunes sa hapon, Septiyembre 1, 2025.
Nagkanayon si Police Captain Leovil Singson, hepe sa Aloguinsan Municipal Police Station nga galisod sila sa pag-ila sa biktima sanglit niburot na ang lawas niini.
Gibana-bana nilang tulo ngadto sa upat ka adlaw na nga gilabay ang biktima sa maong dapit una kini nakit-an.
Midugang si Singson posible dili taga didto ang biktima ug gilabay lang kini sa lugar tungod kay ang mga nagtapok nga mga tawo dihang nakit-an kini wala makaila sa biktima.
Giawhag sa kapulisan sa Lungsod sa Aloguinsan ang publiko ilabi na kadtong pamilya nga dunay mga miyembro nga na-missing sa pagbisita sa Cosmopolitan Funeral Homes sa dakbayan sa Carcar.
Dili pa sab matino sa kapulisan kun ang samad nga nakita sa lawas biktima pinusilan ba kimi sanglit naghuwat pa sila sa resulta gihimong sa autopsy. IBM BANAT NEWS
- Latest
