Managsuon nagkarambola, duha naangol

CEBU, Philippines — Duha ang naangol human nag-unay ug nagkarambola ang upat ka managsuon diha sa Purok 4, Barangay Bulongan, Toledo City niadtong Domingo sa gabii, Agosto 31, 2025.

Ang nalamabigit sa insidente mao ang magsuon nga sila si Doroteo, Julito, Rufino ug Santiago Canuday pulos nagpuyo sa maong dapit.

Sa imbestigasyon sa Toledo City Police Station, si Doroteo hubog matud pa nga niuli sa ilahang panimalay ug giaway ang manghod nga si Julito nga natulog na.

Nasuko si Julito maong gihapak niya og bato ang ulo ni Doroteo ug nagkadugo kini.

Samtang ang laing igsuon nga si Rufino, nakamata sa komosyon ug dihang nakita niya si Doroteo nga nagkadugo iyahang kining giduol aron tabangan unta.

Apan kalit hinoon siyang gidunggab sa iyahang igsuon nga si Santiago gamit ang 'baton sword' sanglit gatuo kini nga siya maoy naghapak og bato sa ulo ni Doroteo.  Si Doroteo ug Rufino gidala sa Toledo City General Hospital.

Hinuon stable na ang kahimtang ni Doroteo samtang si Rufino gibalhin sa Vicente Sotto Memorial Medical Center kay talandugon ang kahimtang niini.

Human mahimo ang krimen, si Santiago daling niikyas apan pasado alas 11 kagahapon sa buntag nadakpan kini sa kapulisan sa Toledo City 

Pinaagi sa tabang informant natultolan kini sa Purok 4, Barangay Bulongan, Toledo City ug boluntaryong nitahan sa kaugalingon.

Na-recover ang mahait nga hinagiban nga gigamit pagdunggab sa iyahang igsuon. 

Ang tibuok pamilya nakadesidir matud pa nga mosang-at og kasong frustrated homicide batok kang Santiago samtang si Julito ilaha rang gipasaylo. (BANAT NEWS)