CSWDO ug CHO sa Lapu-Lapu abli na sa Sabado ug Domingo
CEBU, Philippines — Abli na ang buhatan sa City Social Welfare and Development Office (CSWDO) sa Siyudad sa Lapu-Lapu sa adlaw nga Sabado ug Domingo sa matag semana nunot usab sa kamandoan ni Mayor Cindi King-Chan nga paglugway sa maong mga adlaw sa ilang pagserbisyo ngadto sa mga Oponganon.
Si Chan nipasabot nga daghan kaayo sa mga molupyo sa siyudad ang nanginahanglan og dinalian nga pag-atiman ug naaghat siya sa paglugway sa ilang serbisyo sa adlaw nga Sabado ug Domingo sa matag semana.
Ang pangulo sa CSWDO Shiela Baylosis nagkanayon nga ang maong pagdugang og laing mga adlaw nagsugod niadtong Agosto 23, 2025 diin ang ilang buhatan bukas na matag adlaw sa alas 8:00 sa buntag hangtud sa alas 5:00 sa hapon sa matag adlaw.
Matud ni Baylosis nga lakip sa gihatag nilang serbisyo mao ang medical ug financial assistance for crisis situations, burial assistance ug uban pa nga mga humanitarian programs ug ang paghatag og interventions sa kabataan.
Gibutyag ni Baylosis nga giplano na usab karon nila ang paglugway sa ilang serbisyo ngadto sa mga molupyo sa Isla sa Olango.
Samtang si Dr. Agnes Realiza, pangulo sa City Health Office nagkanayon nga ang paglugway sa ilang serbisyo sa adlaw nga Sabado hangtud sa Domingo dako kini og gikatabang nga kamimosan ang gidaghanon sa magpaabot nila nga mga pasyente.
Matud pa ni Realiza nga nabahig na nila ang gidaghanon sa mga molupyo sa siyudad nga magpaabot sa matag semana tungod kay tibuok semana na man ang ilang pagserbisyo.
Sukwahi kini kaniadto nga ma-pressure sila nga mga kawanai sa pag-atiman sa ilang mga pasyente tungod kay daghan ang nagpaabot sa ilang pag-atiman niini. (BANAT NEWS)
- Latest
















