Ihawan sa Mandaue girekomendar nga temporaryong sirad-an

CEBU, Philippines —  Girekomendar sa Mandaue City Veterinary Office ang temporaryong pagsira sa ihawan sa siyudad alang sa hingpit nga pag-ayo niini.

Suma pa sa City Veterinarian Dr. Karen Merilles, nga ang maong desisyon nauyon usab sa direktiba ni Mandaue City Mayor Thadeo Jovito “Jonkie” Ouano, nga miklaro nga sigurohon nga kasaligan ang supply sa karne sa dakbayan.

Gipasabot niya nga samtang giandam ang rehabilitation plan magpadayon ang ihawan sa pagserbisyo ug pag operate sa mga existing customers.

Giplanohan usab sa siyudad ang posibilidad alang sa Public-Private Partnership (PPP) alang sa proyekto kun ugaling dunay mga interesado.

Si Merilles nitug-an usab nga ang siyudad nagtinguha sa pagkuha og accreditation sa ihawan tungod kay sa pagkakaron wa pa kini accreditation tungod kay gubaon na ang pasilidad ug dili na magamit ang mga ekipos niini. “For now, Single A accreditation is enough for the government to properly manage,” suma pa ni Merilles.

Sa pagkakaron ang ihawan na-rehistro lang apan dili accredited, apan bisan pa niini gipasalig ni Merilles nga ang mga meat products nga giproseso sa ihawan pabiling luwas alang sa pagkaon sa tawo. “Since we have regulations and our meat inspectors in place, it is still safe. But as the mayor pointed out, the issue is really about the facility’s integrity,” dugang pa niya. (BANAT NEWS)