Wa matiwas nga flood control projects gikabalak-an

CEBU, Philippines —  Nabalaka ang mga molupyo sa duha ka sitio sa Barangay Campo 4, Dakbayan sa Talisay kay wala pa gyud mabalik sa pagtrabaho ang flood control project sa ilang dapit.

Si Ma. Elena Tabasa nitataw nga nabalaka sila sa mga pagbaha ingon man kun dunay bagyo nga moigo tungod kay moawas ang tubig sa sapa.

Mao sab kini ang gikabalak-an ni Jestoni Belilia nga residenti sab sa dapit.

Ang duha ka sitio nga wala matiwas mao ang Cambawog ug Bogo sa Campo 4.

Sa tarpaulin nga gipaskil sa sitio Cambawog, ang Department of Public Works and Highways (DPWH) nipahibawo nga ang flood control project adunay budget nga P96.4 milyones ka pesos.

Gisugdan kini sa buwan sa Abril ning tuiga ug humanon sa Enero 18 sa sunod tuig.

Apan ang mga molupyo sa dapit nitataw nga naundang ang trabaho pipila ka adlaw sa wala ang Mayo 12 nga piniliay.

Sa buwan sa Hunyo gipasaligan sila nga tiwason ang trabaho sa kataposang semana sa buwan sa Hulyo apan hangtud karon wala pa kini mahitabo.

Si kapitan Rowena Edar sa Campo 4 ang wala sab nakatago sa iyang kabalaka ug katapusan niya nga gi follow-up ang contractor nga QM Builders niadtong miaging semana.

Ang supervisor sa contractor nga si Marvin Latorre ug ni Engr. Leslie Anthony Molina sa DPWH nipasabot nga nagpaabot nalang sila sa gi apply nila nga Environment Compliance Certificate gikan sa Department of Environment and Natural Resources (DENR).

Asoy pa ni Latorre nga ilang nasugdan ang maong proyekto nga nakahuman na sila og 200 metros nga gilapdon apan nalakip sila sa gipaundang sa trabaho sa dihang gipahunong ang dredging ug desilting project sa kanhi administrasyon sa probinsya sa Sugbo.

Gipasalig hinuon nila nga ila sab susihon pagbalik ang kuwang nila nga papeles aron sa sunod buwan matiwas nila ang proyekto.

Sa samang kalambuan, kada adlaw na ang pagpanglimpyo sa mga sakop sa Aksyon Agad Team sa Dakbayan sa Talisay sa tulo ka barangay nga lapas tuhod ang baha matag bunok sa uwan.

Kini maoy gibutyag ni Gary Togonon, pangu sa AAT ubos sa kamanduan ni mayor Gerald Antony “Samsam” Gullas.

Si konsehal Danny Caballero nga maoy chairman sa committee on resiliency ang nangulo sa task force baha nga maoy motutok sa paglimpyo sa mga kanal. (CEBU NEWS)